Қашқадарё вилоятининг Шаҳрисабз, Қамаши, Деҳқонобод, Яккабоғ ва Китоб туманларида 9 март куни соат 09:00 дан 12:00 га қадар кучли шамол эсиши ва ёғингарчилик қайд этилди. Бу ҳақда Фавқулодда вазиятлар вазирлиги хабар қилди.
Қайд этилишича, ноқулай об-ҳаво натижасида вилоятнинг бир нечта туманларида гирометеорологик хавфли жараёнлар юзага келди. Жумладан:
- соат 11:03 ларда Шаҳрисабз тумани «Чоршанби» қўрғонидаги озиқ-овқат савдо дўконининг том қопламасини шамол учириб юборган;
- соат 11:25 ларда Қамаши тумани «А.Навоий» МФЙда жойлашган елим идишларни йиғиш пунктининг том қопламаси кучли шамолда қулаб тушган. Воқеа оқибатида уч нафар фуқаро турли даражада жабрланиб, туман тиббиёт бирлашмасига мурожаат қилган;
- соат 11:48 ларда кузатилган шамол Яккабоғ тумани «Учтепа» МФЙ, Тош қишлоғидаги уйнинг, «Наврўз» МФЙ, Наврўз қишлоғидаги иккита хонадоннинг қўшимча биноларидаги том қопламаларини учирган;
- соат 11:50 ларда Китоб тумани Қайнар, Мотмон ва Қавзихона қишлоқлари ҳудудидаги 4 дона электр симёғочи ҳамда «Тепабоши» МФЙ ҳудудида 1 та яшаш уйининг том қисми кучли шамол натижасида қулаб тушган.
Республиканинг қолган ҳудудларида, хусусан, Жиззах, Навоий, Сирдарё ва Тошкент вилоятларида қисқа муддатли ёғингарчиликлар кузатилмоқда.
«Кўнгилсиз вазиятларга тушиб қолмаслик учун хавфсизлик қоидаларига риоя қилинг», — дейилади хабарда.
Эслатиб ўтамиз, «Ўзгидромет» Эрондан ва Каспий денгизи ҳудудларидан бир қатор нам ҳаво массалари кириб келиши ҳисобига иш ҳафтасининг охиригача республика ҳудудлари бўйича беқарор об-ҳаво сақланиб туришини маълум қилганди. Шунингдек, «Ўзгидромет» Тошкентда яқин 2 соат ичида кучли момақалдироқ кузатилиб, шамол тезлиги кучайишидан огоҳлантирган.
9 март куни соат 11:45 да Қашқадарё вилояти Деҳқонобод тумани «Откамар» МФЙда ноқулай об-ҳаво шароити натижасида 3 нафар фуқарони яшин урди. Улардан бири вафот этди, икки нафар фуқарога тиббий ёрдам кўрсатилди.
Кейинроқ яшин урган 3 нафар фуқаро бир оила вакиллари экани маълум бўлди. Вафот этган эркак 63 ёшда бўлган. Унинг жароҳат олган 37 ёшли ва 42 ёшли ўғиллари эса айни пайтда шифохонада даволанмоқда.
Изоҳ (0)