Шимолий Корея Япон денгизи томон баллистик ракетани учирди

5 март куни КХДР Япон денгизи томон баллистик ракета учирди. Бу ҳақда Жанубий Корея ҳарбийларига таяниб, «Интерфакс» хабар берди.

Жанубий Корея Қуролли кучлари Бирлашган штаб бошлиқлари қўмитасининг (ЖСC) маълум қилишича, ракета маҳаллий вақт билан соат 08:48 да Пхеньяндаги Сунан туманидан учирилган.

«Айни вақтда ҳарбийларимиз қўшимча ракета учирилиши эҳтимоли борлиги учун Шимолий Корея ҳаракатларини кузатмоқда ва шайлик позициясини эгаллаган», — дейилади ЖСC хабарида.

2022 йил бошидан буён бу КХДРнинг тўққизинчи маротаба ракета учириши ҳисобланади.

27 февраль куни Жанубий Корея Қуролли кучлари КХДР Япон денгизи томон баллистик ракета учирганини маълум қилганди. Кейинроқ Шимолий Корея «разведка сунъий йўлдоши»ни яратиш учун «муҳим синов» ўтказганини билдирган.

Шимолий Корея январь ойининг ўзида етти марта ракета синовини амалга оширган, жумладан, гипертовушли ва ўрта масофага мўлжалланган баллистик ракеталарни учирган.

Январь ойида АҚШ Шимолий Корея ракеталарини учириш частотаси ортиб бораётгани сабабли Бирлашган Миллатлар Ташкилоти орқали янги санкциялар жорий этишни таклиф қилганди, чунки ҳар бир учириш Хавфсизлик Кенгаши резолюцияларини бузади. Бундай санкциялар биринчи марта 2006 йилда киритилган. Улар Шимолий Кореяга ракеталар, материаллар ва уларни ишлаб чиқариш учун зарур технологияларни олиб кириш ва олиб чиқишни тақиқлашни назарда тутган. Кейинчалик чора-тадбирлар комплекси кенгайтирилган.