Шавкат Мирзиёев 3 март куни Покистонга ташрифи давомида мамлакат бош вазири Имрон Хон билан тор доирада музокара ўтказди. Бу ҳақда Президент матбуот хизмати хабар қилди.
Қайд этилишича, Покистон бош вазири Мирзиёевни ташрифи билан қутлаб, Ўзбекистон билан ҳамкорликни ривожлантириш Покистон учун устувор аҳамиятга эга эканини таъкидлаган. Учрашувда асосий эътибор икки давлат ўртасидаги стратегик шерикликни мустаҳкамлаш, сиёсий, савдо-иқтисодий, инвестициявий ҳамкорликни ривожлантириш масалаларига қаратилган.
Таъкидланишича, 2021 йилда ўзаро савдо айланмаси қарийб 50 фоизга ўсган. Жорий йил бошидан яна 70 фоиз ўсиш кузатилган. Бугунги кунда Ўзбекистонда покистонлик инвесторлар томонидан ташкил этилган 177 та корхона фаолият кўрсатмоқда.
Ўзбекистон президентининг ташрифи арафасида Исломободда Ҳукуматлараро комиссия йиғилиши, бизнес-форум, сиёсий маслаҳатлашувлар бўлиб ўтган.
Шавкат Мирзиёев ва Имрон Хоннинг мулоқотида ушбу тадбирларнинг натижалари кўриб чиқилган. Савдо-иқтисодий ва инвестициявий келишувлар ҳажми аввалги йилларга қараганда ўсгани, шу билан бирга, ҳали фойдаланилмаган имкониятлар кўплиги қайд этилган.
Минтақавий ва халқаро аҳамиятига молик масалалар юзасидан фикр алмашилган. Томонларнинг позицияси бир хил ёки ўхшаш экани тасдиқланган. Ўзбекистон ва Покистон халқаро майдонда, жумладан, Бирлашган Миллатлар Ташкилоти, Шанхай ҳамкорлик ташкилоти, Ислом ҳамкорлик ташкилоти ва Иқтисодий ҳамкорлик ташкилоти доирасида бир-бирини қўллаб-қувватлаб келмоқда.
Афғонистонда мураккаблашаётган гуманитар ҳолат сабаб мамлакатга инсонпарварлик кўмаги кўрсатишга жаҳон ҳамжамияти эътиборини кучайтириш муҳимлиги таъкидланган. Имрон Хон Ўзбекистон раҳбари туҳфа қилган урдуча-ўзбекча муштарак сўзлар луғатини мамнуният билан қабул қилган. Унда ўзбек ва урду тилларидаги 3 мингдан ортиқ бир хил маъноли сўзлар жамланган.
Эслатиб ўтамиз, Шавкат Мирзиёев 3–4 март кунлари Покистонга ташриф буюриши хабар қилинганди. Кейинроқ давлат раҳбари Покистонга жўнаб кетгани ва етиб боргани ҳақида хабар берилди. Покистон бош вазири қароргоҳида Шавкат Мирзиёевни расмий кутиб олиш маросими бўлиб ўтди.
Изоҳ (0)