Shavkat Mirziyoyev 3-mart kuni Pokistonga tashrifi davomida mamlakat bosh vaziri Imron Xon bilan tor doirada muzokara o‘tkazdi. Bu haqda Prezident matbuot xizmati xabar qildi.
Qayd etilishicha, Pokiston bosh vaziri Mirziyoyevni tashrifi bilan qutlab, O‘zbekiston bilan hamkorlikni rivojlantirish Pokiston uchun ustuvor ahamiyatga ega ekanini ta’kidlagan. Uchrashuvda asosiy e’tibor ikki davlat o‘rtasidagi strategik sheriklikni mustahkamlash, siyosiy, savdo-iqtisodiy, investitsiyaviy hamkorlikni rivojlantirish masalalariga qaratilgan.
Ta’kidlanishicha, 2021-yilda o‘zaro savdo aylanmasi qariyb 50 foizga o‘sgan. Joriy yil boshidan yana 70 foiz o‘sish kuzatilgan. Bugungi kunda O‘zbekistonda pokistonlik investorlar tomonidan tashkil etilgan 177 ta korxona faoliyat ko‘rsatmoqda.
O‘zbekiston prezidentining tashrifi arafasida Islomobodda Hukumatlararo komissiya yig‘ilishi, biznes-forum, siyosiy maslahatlashuvlar bo‘lib o‘tgan.
Shavkat Mirziyoyev va Imron Xonning muloqotida ushbu tadbirlarning natijalari ko‘rib chiqilgan. Savdo-iqtisodiy va investitsiyaviy kelishuvlar hajmi avvalgi yillarga qaraganda o‘sgani, shu bilan birga, hali foydalanilmagan imkoniyatlar ko‘pligi qayd etilgan.
Mintaqaviy va xalqaro ahamiyatiga molik masalalar yuzasidan fikr almashilgan. Tomonlarning pozitsiyasi bir xil yoki o‘xshash ekani tasdiqlangan. O‘zbekiston va Pokiston xalqaro maydonda, jumladan, Birlashgan Millatlar Tashkiloti, Shanxay hamkorlik tashkiloti, Islom hamkorlik tashkiloti va Iqtisodiy hamkorlik tashkiloti doirasida bir-birini qo‘llab-quvvatlab kelmoqda.
Afg‘onistonda murakkablashayotgan gumanitar holat sabab mamlakatga insonparvarlik ko‘magi ko‘rsatishga jahon hamjamiyati e’tiborini kuchaytirish muhimligi ta’kidlangan. Imron Xon O‘zbekiston rahbari tuhfa qilgan urducha-o‘zbekcha mushtarak so‘zlar lug‘atini mamnuniyat bilan qabul qilgan. Unda o‘zbek va urdu tillaridagi 3 mingdan ortiq bir xil ma’noli so‘zlar jamlangan.
Eslatib o‘tamiz, Shavkat Mirziyoyev 3–4-mart kunlari Pokistonga tashrif buyurishi xabar qilingandi. Keyinroq davlat rahbari Pokistonga jo‘nab ketgani va yetib borgani haqida xabar berildi. Pokiston bosh vaziri qarorgohida Shavkat Mirziyoyevni rasmiy kutib olish marosimi bo‘lib o‘tdi.
Izoh (0)