2022 йилнинг январида Қозоғистонда содир бўлган норозилик намойишлари вақтида Олмаотада ёқиб юборилган президент қароргоҳи бузиб ташланиб, ўрнига сквер қурилади. Бу ҳақда давлат раҳбарининг матбуот котиби Берик Уали маълум қилди.
«Қосим-Жўмарт Тўқаевнинг қарорига кўра, босқинчи ва террорчилар январдаги воқеаларда вайрон қилиб, ёқиб юборган Олмаота шаҳридаги хизмат қароргоҳи бузиб ташланади. Унинг ўрнига шаҳарликлар учун сквер қурилади», — деб ёзади у ўзининг Instagram’даги саҳифасига.
2022 йилнинг февралида Президент ишлари департаменти матбуот хизмати бир неча минг намойишчи 5 январь куни бостириб кирган қароргоҳ 2022 йил якунига қадар қайта тикланишини маълум қилганди.
Маълумотларга кўра, бинонинг биринчи қавати ёниб кетган ва у ерга олиб кирилган автомобиль портлаган. Юқорига кўтарилган олов юқори қаватлардаги пўлат конструкцияларни эритиб юборган. Бинодаги барча тизимлар ишдан чиққан. Шу билан бирга, Қозоғистон кўп тармоқли реконструкция ва тараққиёт институти мутахассислари объектни техник кўрикдан ўтказиш вақтида асосий конструкцияларни «хавфсизлик ва сейсмик барқарорликка путур етказмасдан алмаштиришнинг имкони борлигини» аниқлаган.
Эслатиб ўтамиз, Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланганди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилган.
Мамлакатдаги кескинлик муносабати билан Тўқаев КХШТ (Коллектив хавфсизлик шартномаси ташкилоти)га мурожаат қилиб, ёрдам сўради. Ташкилот чекланган муддатга республикага тинчликпарвар контингент юборганди. Шунингдек, Тўқаев тартибсизликлар сабабларини ўрганувчи, айбдорларни аниқловчи ва жавобгарликка тортувчи тергов гуруҳини тузишни буюрган. Давлат раҳбарининг сўзларига кўра, тартибсизликлар иштирокчилари хорижда малака оширган.
Қозоғистон Ички ишлар вазирлигининг хабар беришича, махсус операциялар давомида 4000 нафарга яқин террорчи ҳибсга олинган, 26 нафар «қуролли жиноятчи» ўлдирилган, яна 18 нафари ярадор қилинган. Қозоғистон Бош прокуратураси оммавий тартибсизликлар, шунингдек, террорчилик актларини содир этиш бўйича тергов доирасида жиноий иш қўзғатди.
Изоҳ (0)