Украинанинг Россия устидан шикояти — геноцидда айбловлар иши бўйича биринчи очиқ тингловлар санаси белгиланди. Бу ҳақда суд матбуот хизмати хабар берди.
Гаагадаги Халқаро судда 7—8 март кунлари Украинанинг Россияга қарши шикояти бўйича тингловлар бўлиб ўтади.
«Бирлашган Миллатлар Ташкилотининг асосий суд органи бўлмиш Халқаро суд ‘Геноцид жиноятининг олдини олиш ва жазолаш тўғрисида’ги конвенцияга мувофиқ Украинанинг Россияга қарши геноцид айбловлари бўйича 2022 йил, 7 март, душанба ва 8 март, сешанба кунлари Гаагадаги тинчлик саройида очиқ тингловлар ўтказади», — дейилади баёнотда.
Қайд этилишича, тингловлар Украинанинг вақтинчалик чораларни жорий этиш тўғрисидаги сўровига бағишланади. Шу билан бирга, COVID-19 пандемияси туфайли учрашувлар гибрид форматда ўтказилади, ишда томонларнинг вакиллари шахсан ёки видеоалоқа орқали иштирок этади. БМТ суди Россияни Украина билан низо доирасида профилактик чоралар кўришга тайёрланишга ҳам чақирди.
27 февраль куни Украина Россия устидан Халқаро судга расман даъво аризасини берганди. Унда ўз тажовузни оқлаш мақсадида геноцид тушунчасини бузиб кўрсатгани учун Россиянинг жавобгарликка тортилиши талаб қилинган.
1 март куни Гаага суди прокурори тез орада Украинадаги вазиятни текширишни бошлаши ҳақида эълон қилди.
Шу куни Россия ташқи ишлар вазири Сергей Лавровнинг БМТ конференциясидаги нутқи трансляцияси қилинаётган пайтда 40 га яқин Ғарб давлати ва уларнинг иттифоқчиларидан, жумладан, Япониядан келган 100 дан ортиқ дипломатлар Россиянинг Украинага босқинига норозилик сифатида Россия вакилига бойкот эълон қилиб, зални тарк этди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)