Польша терма жамоаси ЖЧ—2022 мусобақаси ўтиш баҳслари ярим финалида Россия билан ўйнашдан бош тортмоқда.
«Етарлича гапирилди, энди ҳаракат қилиш вақти келди. Польша терма жамоаси Украинадаги вазият кескинлашгани сабабли Россия билан ўтиш баҳсларида ўйнаш истагида эмас.
Бу ягона тўғри қарор. ФИФАга умумий позицияни етказиш мақсадида Чехия ва Швеция федерациялари билан музокаралар олиб бормоқдамиз», — деб ёзади Польша футбол уюшмаси директори Цезария Кулеши Twitter саҳифасида.
Польша терма жамоаси ҳужумчиси Роберт Левандовски ҳам ушбу фикрни қўллаб-қувватлаган.
«Тўғри қарор. Украинага тажовузкор ҳаракатлар бўлиб турганда Россияга қарши ўйнашни хаёлимга ҳам келтира олмайман. Россиялик футболчилар ва мухлислар бунга айбдор эмас, аммо биз ҳеч нима бўлмагандек ҳаракат қила олмаймиз», — дейди ҳужумчи ўз Twitter саҳифасида.
Шунингдек, Польша терма жамоасининг барча футболчилари мамлакат футбол федерацияси билан келишган ҳолда Россия билан ўйнамоқчи эмаслиги, ҳаётда футболдан муҳимроқ нарсалар борлигини айтган ва ҳатто техник мағлубиятга ҳам тайёрлигини айтган.
Европа минтақасининг ЖЧ—2022 мусобақаси ўтиш баҳслари ярим финалларига ташланган қураъга кўра, Польша билан Россия ўзаро рақиб ҳисобланади. Эслатиб ўтамиз, ярим финал баҳслари 2022 йилнинг 24 мартида, финаллар эса 29 мартда бўлиб ўтади.
24 февраль куни Россия президенти Владимир Путин Донбассда «махсус ҳарбий операция» бошланганини эълон қилди. Айни вақтда Украинанинг қатор ҳудудларида ҳарбий ҳаракатлар давом этмоқда.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)