Polsha terma jamoasi JCh—2022 musobaqasi o‘tish bahslari yarim finalida Rossiya bilan o‘ynashdan bosh tortmoqda.
“Yetarlicha gapirildi, endi harakat qilish vaqti keldi. Polsha terma jamoasi Ukrainadagi vaziyat keskinlashgani sababli Rossiya bilan o‘tish bahslarida o‘ynash istagida emas.
Bu yagona to‘g‘ri qaror. FIFAga umumiy pozitsiyani yetkazish maqsadida Chexiya va Shvetsiya federatsiyalari bilan muzokaralar olib bormoqdamiz”, — deb yozadi Polsha futbol uyushmasi direktori Sezariya Kuleshi Twitter sahifasida.
Polsha terma jamoasi hujumchisi Robert Levandovski ham ushbu fikrni qo‘llab-quvvatlagan.
“To‘g‘ri qaror. Ukrainaga tajovuzkor harakatlar bo‘lib turganda Rossiyaga qarshi o‘ynashni xayolimga ham keltira olmayman. Rossiyalik futbolchilar va muxlislar bunga aybdor emas, ammo biz hech nima bo‘lmagandek harakat qila olmaymiz”, — deydi hujumchi o‘z Twitter sahifasida.
Shuningdek, Polsha terma jamoasining barcha futbolchilari mamlakat futbol federatsiyasi bilan kelishgan holda Rossiya bilan o‘ynamoqchi emasligi, hayotda futboldan muhimroq narsalar borligini aytgan va hatto texnik mag‘lubiyatga ham tayyorligini aytgan.
Yevropa mintaqasining JCh—2022 musobaqasi o‘tish bahslari yarim finallariga tashlangan qura’ga ko‘ra, Polsha bilan Rossiya o‘zaro raqib hisoblanadi. Eslatib o‘tamiz, yarim final bahslari 2022-yilning 24-martida, finallar esa 29-martda bo‘lib o‘tadi.
24-fevral kuni Rossiya prezidenti Vladimir Putin Donbassda “maxsus harbiy operatsiya” boshlanganini e’lon qildi. Ayni vaqtda Ukrainaning qator hududlarida harbiy harakatlar davom etmoqda.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)