Украина Россия ҳужуми ҳақидаги хабарлар сабаб ойига 3 млрд долларгача зарар кўраётганини маълум қилди

Украинага нисбатан ҳужум уюштирилиши ҳақида маълумотлар тарқатилиши оқибатида мамлакат ойига 2-3 миллиард доллар йўқотади. Бу ҳақда президент офиси раҳбарининг ўринбосари Ростислав Шурма «РБК-Украина» нашрига берган интервьюсида маълум қилди.

Шу билан бирга, амалдорнинг таъкидлашича, Украина бюджети тўлиқ халқаро молиявий ташкилотлар билан ҳамкорлик ҳисобига «ёпилмоқда».

«Биз ҳозиргидек стрессли вазиятда қайтариб бўлмас йўқотишлар ойига 2-3 миллиард долларни ташкил этишини кўряпмиз. Бу — тўхтатиб қўйилган инвестициялар ҳамда қўшимча инфляция, туристик соҳадаги йўқотишлар, авиаташувларнинг қисқариши. Шунингдек, молия бозорларида спекулятив босим мавжуд бўлиб, у қарз олишни блоклайди, валюта курсига босим ўтказади, бу тахминан 1,5-2 миллиард долларни ташкил этади», — дейди Шурма.

Унинг сўзларига кўра, «стресс даражаси» шундай қоладиган бўлса, Украинанинг ойлик йўқотишлари ортиб бориши мумкин. Бироқ унинг тахминича, вазият барқарорлашса, бир неча ойдан сўнг йўқотишлар умуман бўлмайди.

Ғарб ОАВ ва сиёсатчилар 2021 йил октябрь ойи охиридан бери Россиянинг Украинага ҳужум уюштиришга тайёрланаётганини тахмин қилиб, Москвани Киевга нисбатан тажовузкор сиёсат юритишда айблаб келмоқда. 14 февраль куни Россия мудофаа вазирлиги мамлакат армиясининг Украина билан чегара ҳудудидаги кенг миқёсли машғулотлари якунига етишини эълон қилди, эртаси куни эса Жанубий ҳамда Ғарбий ҳарбий округлар ўқув машғулотлардан ортга қайтаётганини билдирди. Зеленский Россия ҳарбийларининг Украина чегара ҳудудидан чиқиб кетаётганини сезмаётганини қайд этди.

Январь ойида CNN Украина ва АҚШ президентлари ўртасида Россия таҳдиди борасидаги қарашларда келишмовчилик борлигини маълум қилганди. Телеканал манбаларининг маълумотларига кўра, «АҚШнинг ҳаддан ортиқ эътибори» Зеленскийнинг жонига тегган, Жо Байденга эса унинг украиналик ҳамкасби муаммонинг жиддийлигини камайтиришга уринаётгани ёқмаган.

Россия ҳукумати бир неча бор Москва ҳужумни режалаштирмаётганини маълум қилди. Россия ташқи ишлар вазири Сергей Лавров Ғарбнинг ҳужумга тайёргарлик борасидаги версиясини «пропаганда, фейк ва уйдирма» деб атаган. Президент Владимир Путин ҳам Россия Европа билан янги урушни хоҳламаслигини таъкидлаган.

Январь охирларига Зеленский Россиянинг Украинага ҳужум борасида хабарларнинг тарқатилиши оқибатида мамлакат иқтисодиётидан 12,5 миллиард доллар олиб чиқиб кетилганини билдирганди.