АҚШнинг Москвадаги элчихонаси америкалик фуқароларни Россиядаги жамоат жойларида терактлар содир этилиши хавфидан огоҳлантирди.
«ОАВ маълумотларига кўра, йирик шаҳарлар, жумладан, Москва ва Санкт-Петербургдаги савдо марказлари, темир йўл ва метро бекатлари, бошқа гавжум жойларга, шунингдек, Россиянинг Украина билан чегарасидаги кескинлик юқори бўлган ҳудудларга ҳужум уюштирилиш хавфи бўлган», — дейилади элчихона сайтида.
Элчихона терактлар хавфи ҳақида маълумот тақдим этган ОАВларга ҳавола бермаган.
Бундай таҳдидлар ҳақида эълон қилингандан сўнг, АҚШ дипломатлари Россиядаги ватандошларига ОАВларни кузатиб боришни, оломондан узоқ бўлишни, дўстлар ва оила аъзолар билан алоқани сақлашни ҳамда «АҚШ ҳукуматининг ёрдамисиз ҳам» Россиядан эвакуация режасини тузишни маслаҳат бермоқда.
Россия Ташқи ишлар вазирлигининг расмий вакили Мария Захарова ўзининг Telegram-каналида Америка элчихонаси хабарига муносабат билдирди. «АҚШнинг Москвадаги элчихонасига савол: Тегишли маълумотларни ҳамкор каналлар орқали россиялик ҳамкасбларингизга узатдингизми? Агар ундай бўлмаса, буни қандай тушуниш керак?» — деб ёзган у.
Январь ойи бошида АҚШ элчихонаси америкаликларга Украина билан чегарада давом этаётган кескинлик туфайли Россияга бормасликни тавсия қилганди. Огоҳлантиришда Шимолий Кавказда терактлар хавфи ҳақида ҳам сўз борган. Украина атрофидаги вазиятнинг кескинлашуви фонида АҚШ Давлат департаменти ҳам америкаликларга Украина ва Беларусга саёҳатдан тийилишни тавсия қилган.
Изоҳ (0)