Жонс Ҳопкинс университети маълумотларига кўра, дунёда коронавирусга чалинганлар сони 424 496 141 кишини ташкил қилмоқда, шуларнинг 5 888 183 нафари вафот этган. Айни вақтга қадар жаҳон бўйича 10,352 миллиард доза вакцина қўлланган.
Касалланганлар сони бўйича АҚШ (78,4 миллион), Ҳиндистон (42,8 миллион), Бразилия (28,2 миллион), Франция (22,4 миллион) ва Буюк Британия (18,7 миллион) энг олдинда бормоқда.
Коронавирусга қарши эмланмаган барча ёшдаги сайёҳлар 1 мартдан бошлаб Исроилга иккита ПЗР-тестини топшириш орқали кириши мумкин.
Мамлакат бош вазири Нафтали Беннет Haaretz нашрига берган интервьюсида шундай деган: «Биз касалланиш ҳақидаги маълумотларнинг барқарор камайиб бораётганига гувоҳ бўляпмиз, шунинг учун чегараларни аста-секин қайта очиш вақти келди».
Исроилга кириш учун эмланмаганлар мамлакатга учишдан олдин ва келганидан кейин ПЗР-тестидан ўтиши керак бўлади.
17 февраль куни Исроил ҳукумати 1 мартдан бошлаб мамлакатда ёпиқ жойларга ва йирик тадбирларга ташриф буюриш учун талаб этиладиган COVID-паспортларининг бекор қилинишини билдирганди. Ўшанда Беннет Исроил мамлакатдаги омикрон тўлқинини «енгганини» айтган.
Исроил коронавируснинг омикрон штамми пайдо бўлганидан кейин ўз чегараларини ёпган дунёдаги биринчи давлат бўлганди.
Буюк Британия бош вазири Борис Жонсон 21 февраль куни мамлакат қандай қилиб «COVID-19 билан яшаши» ҳақидаги режаларини эълон қилди.Таъкидланишича, бошқа чекловлар қаторида COVID-тести мусбат чиққан ва касаллар билан алоқада бўлган шахслар учун мажбурий ўзини-ўзи изоляция қилиш тартибини бекор қилиш режалаштирилган. Ҳисоботга кўра, ҳукумат «вакцинага асосланган» ёндашувни амалга оширишни режалаштирмоқда ва вирус билан яшаш «вакциналар томонидан таъминланган кучли аҳоли иммунитетига» боғлиқ, деган фикрда.
Буюк Британия ҳукуматининг фавқулодда вазиятлар бўйича маслаҳат гуруҳи (САГЕ) «Буюк Британияда пандемия энди қандай йўлдан кетиши борасида жиддий ноаниқлик» мавжуд, деб ҳисоблайди.
«Бугун мамлакатимиз тарихидаги яна бир энг оғир даврдан кейинги фахрланиш лаҳзаси бўлади, чунки биз COVID-19 билан яшашни ўрганишни бошлаймиз. Пандемия ҳали тугамаган, аммо вакциналарнинг ақл бовар қилмас даражада жорий этилиши туфайли биз энди нормал ҳолатга қайтишга бир қадам яқинлашдик ва ниҳоят ўзимизни шунингдек, бошқаларни ҳимоя қилишда давом этиб, одамларга эркинликларини қайтариб берамиз», — дейилади бош вазир идорасининг баёнотида.
Мавзуга доир: Борис Жонсон Англияда кўплаб коронавирус чекловлари, хусусан тиббий ниқоб тақиб юриш бекор бўлишини эълон қилди
«Ҳозир прогноз қилиш қийин, аммо умид қиламизки, агар бошқа ҳодиса содир бўлмаса, пандемия 2022 йилда тугайди. Пандемиянинг тугаши нима дегани? Бу касалланиш ҳолатларида катта кўтарилишлар бўлмайди, деган маънони англатади, аммо вирус йўқолади дегани эмас», — деди у.
ЖССТ вакилининг сўзларига кўра, вируснинг мутацияга учрагаш қобилияти ва бошқа кўплаб инфекциялар вазият қандай ривожланишини аниқ башорат қилишга имкон бермайди. «Аммо омикрон бутун дунёни айланиб чиққач, катта эпидемиялар тугайди, деган эҳтиёткор оптимизм бор», — деди Вуйнович.
Унинг сўзларига кўра, ЖССТ пандемия қачон тугашини аниқ башорат қилишга уриняпти, аммо ҳозир мамлакатлар «ўзларининг тестдан ўтказиш стратегияларини ўзгартираётгани» сабабли қийинчиликлар юзага келмоқда. Унинг тушунтиришича, омикрон штамми жуда юқумли ва тез тарқалади, асемптоматик инфекцияларнинг кўплигини ҳисобга олиб, «баъзи мамлакатларда ҳаммани текшириш учун молиявий ёки бошқа имкониятлар йўқ».
«Биз кўриб турган тасвир пандемия бошида ва дельта тўлқини пайтида бўлгани каби, вирус юқтирганларнинг аниқ сонини тўлиқ акс эттирмайди», — дея хулоса қилди ЖССТ вакили.
2021 йилнинг декабрь ойида ЖССТ раҳбари Тедрос Гебрейесус ҳам 2022 йил коронавирус пандемиясига барҳам бериладиган йил бўлиши мумкинлигини айтганди.
Изоҳ (0)