18 февраль куни Туркманистон президенти вазифасини бажарувчи Гурбангули Бердимуҳамедов Руҳият саройида Давлат хавфсизлик кенгаши аъзолари иштирокида Вазирлар Маҳкамасининг кенгайтирилган йиғилишини ўтказди. Бу ҳақда «Тукменистан сегодня» давлат ахборот агентлиги хабар берди.
Маълум қилинишича, 18 февраль куни Туркманистонда Дипломатик ходимлар куни нишонланган. Унда Гурбангули Бердимуҳамедовни «Туркманистонда хизмат кўрсатган дипломат» кўкрак нишони билан тақдирлаш маросими бўлиб ўтган.
Таъкидланишича, мазкур кўкрак нишони президентнинг 2021 йил 9 февралдаги қарори билан жорий этилган. Ўшанда у билан дипломатик хизматларнинг ходимлари «Туркманистоннинг тинчликсевар конструктив ташқи сиёсатини амалга ошириш, хорижий давлатлар билан турли соҳаларда алоқаларни мустаҳкамлаш, нуфузли халқаро ташкилотлар билан самарали мулоқотни кенгайтиришга қўшган шахсий ҳиссаси ва ватан олдидаги бошқа хизматлари учун» тақдирланиши айтилганди. Бердимуҳамедов ушбу мукофотга биринчи бўлиб лойиқ кўрилди.
Тақдирлаш маросимидан сўнг, Губангули Бердимуҳамедов «Фаровонлик сари ёрқин қадамлар» номли янги китоби устидаги ишларни тугатганини маълум қилиган бўлиб, у президентнинг жамоатчилик олдидаги чиқишларини ўзида жамлаган. Шунингдек, унга Туркманистонни янада ривожлантиришга оид кўплаб таклифлар киритилган.
Бердимуҳамедов китобнинг бир нусхасини ташқи ишлар вазири Рашид Мередовга топширган ва тадбирдан кейин ҳамма ушбу китобни олиши мумкинлигини таъкидлаган.
Маълумот учун, Гурбангули Бердимуҳамедовнинг бундан олдинги — 55-китоби («Мустақиллик — бахтимиз») 25 сентябрь куни Туркманистон мустақиллигининг 30 йиллиги муносабати билан Халқ маслаҳати йиғилишида тақдим этилганди.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов бошқарувчи ёшларга топшириш ва фаолиятини Халқ маслаҳати раиси сифатида давом эттириш борасидаги ниятини маълум қилган.
Изоҳ (0)