Қозоғистон бош прокуратураси ходимлари мамлакат собиқ мудофаа вазири Мурат Бектановни ҳибсга олди. У 2022 йилнинг январь ойидаги тартибсизликлар чоғида ҳаракатсизликда гумонланмоқда, дея хабар берди бош прокуратура матбуот хизмати.
«19 февраль куни бош прокуратура томонидан собиқ мудофаа вазири Бектанов Мурат Карибаевичга нисбатан Қозоғистон Республикаси Жиноят кодексининг 452-моддаси билан хизмат давомида ҳаракатсизлик факти бўйича судга қадар тергов ҳаракатлари бошланди. 20 февраль куни Бектанов ушбу жиноятни содир этганликда гумон қилиниб, ушланди ва вақтинчалик сақлаш изоляторига жойлаштирилди», — дейилади хабарда.
Қонун ҳужжатларига мувофиқ, «Ҳукумат ҳаракатсизлиги» моддасига кўра, агар мансабдор шахснинг ўз хизмат вазифаларини бажармаслиги оғир оқибатларга олиб келган бўлса, у тўрт йилдан саккиз йилгача озодликдан маҳрум қилиш билан жазоланади. Лоқайдлик ҳаракатлари жанговар вазиятда содир этилган бўлса, беш йилдан ўн йилгача озодликдан маҳрум қилиш билан жазоланади.
11 январь куни Қозоғистон президенти Қосим-Жўмарт Тўқаев янги ҳукумат таркибини тасдиқлаганди. Ўшанда Бектанов ўз лавозимини сақлаб қолган, бироқ 19 январь куни унинг ўрнига Руслан Яхшилиқов тайинланган. Давлат раҳбари ушбу қарорни тушунтирар экан, раҳбариятнинг ўта ноаниқлиги ва ташаббус кўрсатмагани сабабли январь воқеалари вақтида армия ўз олдига қўйилган вазифаларни бажармагани, мудофаа вазирида қўмондонлик фазилатлари намоён бўлмаганини таъкидлади.
Қозоғистонда 5 январда бошланган тартибсизликлардан сўнг Миллий хавфсизлик қўмитасининг собиқ раиси Карим Масимовга нисбатан давлатга хиёнат бўйича судга қадар тергов иши бошланганди. Масимовдан ташқари қўмита раисининг икки собиқ ўринбосари ҳам ҳибсга олинган.
Тартибсизликлар фонида Тўқаев мамлакат биринчи президенти Нурсултон Назарбоевнинг ўрнига Хавфсизлик кенгаши раҳбари ваколатларини зиммасига олди. 25 январда Тўқаев биринчи президентнинг қизи Дариға Назарбоеванинг қудасини Марказий сайлов комиссияси раҳбарлигидан бўшатди, икки кунда кейин Қозоғистон парламенти Назарбоевни Хавфсизлик кенгашига умрбод раислик ваколатидан маҳрум қилди, 28 январда Тўқаев Қозоғистонда ҳукмрон Нур Отан партиясининг раиси этиб сайланди.
Изоҳ (0)