Туғуруқдан кейинги озиш: 4 та оддий қоида

Агар ҳомиладорлик ва туғуруқдан кейин тезда нормал ҳолатга қайтишни истасангиз, ушбу оддий маслаҳатларга амал қилинг.

Дам олинг

Биринчи галда қиладиган ишингиз — дам олиш. Сиз онасиз ва ишонинг, сиз гўзалсиз. Кир футболкада ҳам, сочларингиз таралмаган, кўз остингиз уйқусизликдан қорайган бўлса ҳам. Вазнингиз ва белингизнинг ўлчами ҳақида ташвишланиш ҳам шарт эмас. Стресс — сиз ва болангизга керак бўлмаган нарса. Шунинг учун олдингизга енгил ва кичик мақсадлар қўйинг. Ҳафтада ярим килога озиш ҳам кичик нарса эмас, бир неча ой ичида бу кичик «йўқотишлар» ажойиб натижага олиб келади.

Сайр қилинг

Метаболизмни «уйғотиш» ва ҳаётингизга жисмоний фаолликни қўшишнинг энг осон ва жуда самарали усули — юриш. Тоза ҳаво ва қуёш нури ёғ йўқотишни тезлаштиришга ёрдам берадиган қўшимча омиллардир, шунинг учун қулай пойабзал кийинг, телефонингизга мос мусиқа (ёки қизиқарли маърузалар) юкланг ва сайрга боринг.

Уйқудан воз кечманг

Кўпинча ёш оналарга «дангаса бўлмаслик» (бола тарбиялаётган аёлларни дангаса деб ҳисоблайдиганлар қандай одамлар экан) учун чақалоқ ухлаётганда турли хил фойдали машғулотларга вақт ажратиш бўйича тавсиялар беришади — тозалаш, пишириш, спорт машқлари каби. Биз бунга қатъиян қаршимиз: ёш она қилиш керак бўлган энг муҳим нарса бу — бўш вақтида ухлашдир. Ухлаш асаб тизимини қўллаб-қувватлашдан ташқари, метаболизмни яхшилашга ёрдам беради ва ортиқча ёғларни йўқотишга ёрдам беради.

Ўз вақтида овқатланишга ҳаракат қилинг

Маълумки, ёш оналарнинг вақти уларга боғлиқ эмас ва баъзида бирор нарса еб олиш учун бир дақиқа топиш деярли имконсиз. Аммо барибир, ҳеч бўлмаганда нонушта қилишга ҳаракат қилинг ва кун давомида тўйимли ва фойдали нарса еб юринг. Мева ва сабзавотлар, ёнғоқлар, сут маҳсулотлари — буларнинг барчаси энергиянгизни қўллаб-қувватлашга ёрдам беради, қоматингиз фойдасига ишлайди.