Буйраклар организмда муҳим функцияларни бажаради, қонни фильтрлайди ва сув мувозанатини тартибга солади. Шунинг учун уларнинг саломатлигини диққат билан кузатиб бориш лозим.
Мунтазам фаоллик
Мунтазам жисмоний машқлар нафақат бел учун фойдалидир. Балки улар сурункали буйрак касаллиги ривожланиш хавфини камайтириши ҳам мумкин. Машқ қилиш қон босимини пасайтиради ва буйрак касаллигининг олдини олиш учун муҳим бўлган юрак соғлиғини яхшилайди.
Жисмоний фаолликдан фойда олиш учун марафонларда югуриш шарт эмас. Юриш, югуриш, велосипед ҳайдаш ва ҳатто рақсга тушиш саломатлик учун жуда фойдали. Ўзингизга ёқадиган машғулотни топинг, шунда фаол бўлиш ва ажойиб натижаларга эришиш осонроқ бўлади.
Қонда қанд миқдорининг назорати
Қандли диабет билан оғриган одамларда буйраклар касалланиши мумкин. Организмнинг ҳужайралари қондаги глюкозадан етарли даражада фойдалана олмаса, гипергликемия ривожланади, бу буйракларга зарар етказиши мумкин. Бироқ қонда шакар даражасини назорат қилинса, хавфлар камаяди. Бундан ташқари, агар зарар эрта аниқланса, шифокор қўшимча зарарни камайтириш ёки бунинг олдини олиш чораларини кўриши мумкин.
Қон босими назорати
Артериал гипертензия буйрак касаллигига олиб келиши мумкин. Агар юқори қон босими диабет, юрак касаллиги ёки юқори холестерин даражаси каби бошқа соғлиқ муаммолари билан боғлиқ бўлса, бу саломатликка катта таъсир кўрсатади.
Агар қон босими доимий равишда юқори бўлса, шифокор билан қон босимини мунтазам текшириб туриш, турмуш тарзини ўзгартириш ва, эҳтимол, дори-дармонларни қабул қилиш ҳақида маслаҳатлашиш керак.
Вазн ва рационга эътиборли бўлиш
Ортиқча вазнли ёки семириб кетган одамларнинг буйраклари бир қатор касалликлар хавфи остида қолади. Соғлом овқатланиш буйрак касалланишининг хавфини камайтиришга ёрдам беради. Донли, тузи кам маҳсулотларга эътибор қаратиш ва юқори даражада қайта ишланган маҳсулотларгаларни ҳаддан ташқари кўп истеъмол қилмаслик зарур. Агар рациондан бу каби маҳсулотлар ўрин олган бўлса, мутахассис билан маслаҳатлашиш зарур.
Суюқликни етарлича ичиш
Кунига саккиз стакан сув ичиш маслаҳати жуда кўп такрорланади. Аммо етарли миқдорда суюқлик ичишнинг аҳамиятини ортиқча баҳолаб бўлмайди. Мунтазам сув ичиш буйраклар учун фойдалидир. Сув натрий ва метаболитларни олиб ташлашга ёрдам беради. Шунингдек, сурункали буйрак касаллиги хавфини камайтиради.
Одамнинг қанча суюқлик ичиш кераклиги кўп жиҳатдан унинг соғлиғи, фаолият даражаси, яшаш жойи ва турмуш тарзига боғлиқ. Аммо кунига 1,5-2 литр сув кўпчилик учун яхши кўрсатма бўлиши мумкин. Ўтмишда буйракда тошлари бўлган одамлар бунинг олдини олиш учун бироз кўпроқ сув ичишга риоя қилган.
Кашандаликни ташлаш
Чекиш қон томирларига зарар етказади. Бу бутун организмда, шу жумладан, буйракларда қон оқимининг секинлашишига олиб келади. Чекиш ҳам буйрак саратони хавфини оширади. Агар чекиш тўхтатилса, хавф сезиларли даражада камаяди. Бироқ ҳеч қачон чекмаган одамнинг ҳолатига қайтиш учун кўп йиллар керак бўлади.
Қабул қилинаётан дорилар миқдори
Агар мунтазам равишда рецептсиз оғриқ қолдирувчи дори воситалари қабул қилинса, бу буйракларга зарар етказиши мумкин. Яллиғланишга қарши, сурункали оғриқ, бош оғриғи ёки артрит учун мунтазам равишда дори қабул қилинса, буйракларга зарар етиши мумкин.
Ушбу дори-дармонларни вақти-вақти билан қабул қиладиган ва буйракда муаммоси бўлмаган одамлар учун бу одатда хавфсиздир. Аммо ушбу дори-дармонлар ҳар куни қабул қилинса, буйрак саломатлиги учун хавф туғилиши мумкин. Агар оғриқ билан курашиш керак бўлса, шифокор билан буйраклар учун зарарсиз даволаш чораларини кўриш мумкин.
Юқори хавф гуруҳидаги беморлар буйрак функцияларини текшириши лозим
Агар буйрак фаолиятида бузлиши ёки буйрак касаллиги хавфи юқори бўлса, уларни мунтазам равишда текшириш тавсия этилади. Хавф гуруҳига қуйидагилар киради:
- 60 ёшдан ошган одамлар;
- кам вазн билан туғилган одамлар;
- юрак-қон томир касалликлари билан оғриган ёки улар билан қариндош бўлган одамлар;
- қон босими юқори бўлган одамлар;
- семиз одамлар.
Изоҳ (0)