Украина президенти Владимир Зеленский мамлакат Миллий хавфсизлик ва мудофаа кенгашининг (МХМК) давлат хавфсизлиги стратегиясини тасдиқлади. Тегишли фармон Украина президентининг расмий сайтида эълон қилинган.
Ҳужжатда мамлакат учун реал ҳамда келгусида юзага келиши мумкин бўлган таҳдидлар белгилаб берилган.
Стратегияда, жумладан, Россиянинг ўз стратегик мақсадларини амалга ошириш учун Украинага қарши тургани, гибрид уруш бошлагани, бунда сиёсий, иқтисодий, ахборот-психологик воситалар ва киберҳужумлардан фойдаланаётгани қайд этилган.
Шунингдек, стратегияда Украинада босиб олинган ҳудудлардаги ҳукуматлар (Украина Киев ихтиёридан чиққан Қрим, шунингдек, Донецк ҳамда Луганск вилоятлари ДХР ва ЛХРни шундай атаган) инсон ва фуқаролар ҳуқуқларини, Украина давлат хавфсизлиги, ҳудудий яхлитлиги талабларини қўпол равишда бузмоқда.
Бундан ташқари, ҳужжатда Украинага нифоқ соладиган мамлакат ичида ва ундан ташқаридаги мафкуравий таҳдидлар, низолар келтириб чиқаришга қаратилгани, Россиянинг ахборот мустамлакачилиги фонида жамият яхлитлигини бузишга даъват этади.
Украина давлат хавфсизлиги сиёсатининг йўналишлари сифатида қуйидагилар белгиланган:
- давлат хавфсизлигини таъминлаш ва ЕИ ҳамда НАТО қонунларига ҳамоҳанг тарзда миллий қонунчиликни такомиллаштириш;
- давлат сирлари ва хизмат сирлари хавфсизлигини таъминлашда НАТО ва Евроиттифоқ хавфсизлик стандартларидан келиб чиқиш;
- давлат хавфсизлигини таъминлашда янги йўналишларни жорий этишда халқаро дастурларга қўшилиш.
2021 йил декабрь ойи охирида Украинада ахборот хавфсизлиги стратегияси тасдиқланган. Ҳужжатда етти асосий мақсад белгиланган, улардан бири ахборот маконида Россия томонидан қилинаётган дезинформация ва бошқа ахборот хуружларига қарши курашишдан иборат.
Январь ўртасида Украина ТИВ раҳбари Дмитрий Кулеба ҳарбийларни чегара ҳудудида кўпайтираётган Россияни тийиб туриш юзасидан режа тақдимотини ўтказган. Режада учта асосий банд мавжуд: дипломатик саъй-ҳаракатлар, санкциялар ишлаб чиқиш ва Ғарб мамлакатлари ҳамда Украина ўртасида мудофаани кучайтириш борасида ҳамкорликни мустаҳкамлаш. Кейинчалик режага яна бир банд қўшилди: Украинанинг иқтисодий ва молиявий барқарорлигини таъминлашга кўмаклашиш.Ғарб ОАВ ва сиёсатчилар 2021 йил октябрь ойи охиридан бери Россиянинг Украинага ҳужум уюштиришга тайёрланаётганини тахмин қилиб, Москвани Киевга нисбатан тажовузкор сиёсат юритишда айблаб келмоқда. 14 февраль куни Россия мудофаа вазирлиги мамлакат армиясининг Украина билан чегара ҳудудидаги кенг миқёсли машғулотлари якунига етишини эълон қилди, эртаси куни эса Жанубий ҳамда Ғарбий ҳарбий округлар ўқув машғулотлардан ортга қайтаётганини билдирди. Зеленский Украинанинг Россия ҳарбийларининг чегара ҳудудидан чиқиб кетаётганини сезмаётганини қайд этди.
Изоҳ (0)