Украина президенти Владимир Зеленский «Россия пропогандасига қарши туриш» учун Донбасс аҳолиси орасида Украина оммавий ахборот воситаларининг таъсирини кучайтиришга чақирди. Бу ҳақда давлат раҳбари девонининг матбуот хизматига таяниб, «ТАСС» хабар берди.
«Президент Владимир Зеленский Донецк вилоятига ишчи сафари чоғида хавфсизлик масалалари, мудофаа кучларининг Россиянинг қуролли босқинини қайтариш ва Россия пропогандасига қарши туришга тайёрлиги бўйича йиғилиш ўтказди. Президент Донбасс аҳолиси орасида Украина оммавий ахборот воситаларининг таъсирини кучайтиришга алоҳида эътибор қаратди», — дейилади хабарда.
«Биз Украина телевидениеси ва бошқа оммавий ахборот воситаларининг таъсирини кенгроқ ёйишимиз керак», — дея Зеленскийнинг сўзларини келтирган президент матбуот хизмати.
Украина президенти Донбасс ҳудудига 16 февраль куни ташриф буюрган.
Сўнгги пайтларда Ғарб мамлакатларида Россиянинг Украина ҳудудига бостириб кириши мумкинлиги ҳақидаги баёнотлар янграмоқда ва ҳатто «босқин саналари» ҳам тахмин қилинмоқда. Хусусан, Politico газетасида чоп этилган материалда айтилишича, АҚШ президенти Жо Байден иттифоқчи давлатлар раҳбарлари билан видеоконференция вақтида босқин санасини 16 февраль деб атаган.
Ушбу медиа-кампания аллақачон Украинадаги иқтисодий вазиятнинг кескин ёмонлашишига, капитал ва бизнеснинг мамлакатдан чиқиб кетишига сабаб бўлди, шунингдек, Европада энергия нархининг ошишига олиб келди. Январь ойи охирида Зеленский ахборот майдонида «Россия босқинининг эҳтимоли борлиги» ҳақидаги хабарлар пайдо бўла бошлаганидан кейин мамлакатдан 12,5 миллиард доллар олиб чиқиб кетилганини эълон қилди.Россия президенти матбуот котиби Дмитрий Песков буни Европадаги кескинликни кучайтиришга қаратилган мисли кўрилмаган ахборот кампанияси деб атади. У Россия бирор давлатга ҳужум қилмоқчи эмаслигини ва бировга таҳдид солмаслигини бир неча бор таъкидлаган.
Изоҳ (0)