Мари вилояти ҳокими ўринбосари, Туркманистон Аграр партияси вакили Агаджан Бекмирадов мамлакатда муддатидан олдин ўтказиладиган президентлик сайловларига навбатдаги номзод сифатида кўрсатилди. Бу ҳақда «Туркменистан сегодня» давлат ахборот агентлиги хабар берди.
Агентликнинг таъкидлашича, партия аъзолари «давлат раҳбарининг Халқ маслаҳати йиғилишида ёш етакчилар номзодини кўрсатиш бўйича билдирилган ғояси муҳимлигини қайд этган». Бекмирадов қачон туғилган айтилмаган, аммо у Туркманистон архитектура-қурилиш институтини 1995 йилда тамонлагани маълум қилинган. Шу сабабли унинг ёши 47—48 атрофида бўлиши керак. Мамлакатда президентлик лавозимига 40 ёшдан катталар сайланиши мумкин.
2022 йилнинг 12 март санасига белгиланган президентлик сайловлари мутлақо янгича тарихий шароитларда ўтказилиши айтилмоқда. «Замонавий даврда ватанимиз президент Гурбангули Бердимуҳамедов раҳнамолигида туб ижтимоий-иқтисодий ва демократик ислоҳотларни амалга ошириш, жамиятда туркман халқига хос бўлган чинакам демократик тамойилларини мустаҳкамлаш борасида мисли кўрилмаган муваффақиятларга эришди», — дейилади хабарда.
15 февраль куни Гурбангули Бердимуҳамедов ўғли, иқтисодиёт бўйича бош вазир ўринбосари Сердар Бердимуҳамедов бўлажак сайловларда мамлакат президентлигига биринчи номзод сифатида кўрсатилганди. Сердар Бердимуҳамедов 2020 йилнинг февралида саноат вазири лавозимини эгаллаган, 2021 йилнинг февралидан эса Туркманистон бош вазири ўринбосари лавозимида ишлаб келаётган эди. Июль ойида Сердар Бердимуҳамедов бош вазирнинг молия ва иқтисодиёт бўйича ўринбосари этиб тайинланган.
Эслатиб ўтамиз, 11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов бошқарувчи ёшларга топшириш ва фаолиятини Халқ маслаҳати раиси сифатида давом эттириш борасидаги ниятини маълум қилган.
Изоҳ (0)