Зеленский айни вақтда оиласи билан бирга Украинадан чиқиб кетиш эҳтимоли йўқлигини билдирди

Украина президенти Владимир Зеленский унинг оиласи мамлакат ҳудудида эканлиги ва айни вақтда бу ерни тарк этмоқчи эмаслигини маълум қилди, деб ёзмоқда «Интерфакс».

«Менинг оилам, мен билан ва ҳамиша Украина билан бирга қолади. Мен президентман, рафиқам шунчаки турмуш ўртоқ эмас, у мамлакатнинг биринчи хоними. У барчага оила қийин паллада ўзини қандай тутиши кераклиги борасида ўрнак бўлиши лозим... Бу мамлакат ва жамиятимиз учун жуда муҳим масала», – дея журналистлар томонидан Украинадан чиқиб кетаётган бизнесменлар ва сиёсатчиларнинг оилалари ҳақида берилган саволга жавоб берган Зеленский.

Зеленский 13 февралнинг ўзида Украинадан 30 та самолёт учиб кетганини қўшимча қилди.

«Менимча, Украинада ишончли одамлар қолди. Украина фуқаролари шу ерда ва мен уларнинг ҳаммасига миннатдорлик билдираман», – деган Украина президенти.

Шунингдек, Зеленский республикадан чиқиб кетган бизнесменлар ва сиёсатчилардан мамлакатга 24 соат ичида қайтишни сўраб, бирлашиш вақти келганлигини қайд этди.

«Мамлакатимиз менежментига, чегара яқинидаги одамларга, айрим партиялар депутатларига асосий эътиборни қаратмоқчиман, уларни номма-ном санамоқчи эмасман, уларнинг қандай одамлар эканини яхши тушуниб турибсиз. Бу жиддий чақириқ деб ўйлайман. Биз уларга адолатли сигнал беришимиз зарур. Аввало Олий Рададан, спикердан, давлатдан ва шахсан ўзимдан яқин 24 соат давомида мамлакатдан чиқиб кетган яқин қариндошларни қайтаришга чақиришни сўрайман» – деган Зеленский.

У нутқи сўнгида Украина учун муҳим палла келгани, бу мамлакат бирлашадиган вақт эканлигини таъкидлаган.

Аввал Украинадаги вазият туфайли буғдойнинг жаҳон нархлари ошиб бораётгани, Ўзбекистоннинг Украинадаги элчихонаси фуқароларга мурожаат билан чиққани, Пентагон АҚШ аскарлари Украинада жанг қилмаслигини тасдиқлагани, Путин бир кун ичида Байден, Макрон ва Лукашенко билан музокаралар ўтказгани, Австралия ва Канада Украинадаги вазият сабаб Киевдаги элчихонасини бошқа шаҳарга кўчираётгани, АҚШдан кейин Нидерландия, Черногория, Япония, Латвия, Буюк Британия ва Жанубий Корея ҳам фуқароларидан Украинага бормасликни сўрагани, кейинчалик Янги Зеландия ва Австралия ўз фуқароларини зудлик билан Украинани тарк этишга чақиргани ҳақида хабарлар берилган.