Уэльс шаҳзодаси, Буюк Британия қироличасининг тўнғич ўғли Чарльзда коронавирус инфекцияси аниқланди. Бу ҳақда унинг матбуот хизмати Twitter’даги саҳифаси орқали маълум қилди.
«Бугун тонгда Уэльс шаҳзодасининг COVID-19 га топширган тести натижаси ижобий чиқди ва ҳозирда ўзини ўзи яккалаш режимига ўтган», — дейилади хабарда.
Шаҳзода Чарльз иштирокида ўтказилиши керак бўлган тадбирлар, хусусан, унинг Винчестерга сафари бекор қилинган.
BBC’нинг ўз манбаларига таяниб ёзишича, коронавирус тасдиқланишидан икки кун олдин шаҳзода Чарльз Буюк Британия қироличаси Елизавета II билан учрашган. Қироличада касалликнинг ҳеч қандай белгилари кузатилмаяпти.
73 ёшли шаҳзоданинг аҳволи қандай эканлигига аниқлик киритилмаган. 2020 йилнинг мартида ҳам Чарльзда коронавирус аниқланган, бироқ енгил кечган эди. 2021 йилнинг февралида эса шаҳзода Чарльз ва унинг рафиқаси Корнуолл герцогиняси Камилла коронавирус инфекциясига қарши эмланганди.
Аввалроқ Дания қироличаси Маргрете II ва Испания қироли Филипп VI да ҳам коронавирус аниқлангани тўғрисида хабар берилганди.
Изоҳ (0)