Буюк Британия ташқи ишлар вазири Лиз Трасс COVID-19 билан касаллангани туфайли Москвага режадаги муддатдан икки ҳафтага кечикиб етиб келди. У ташрифнинг биринчи кунида Алесандр боғида бўлди ва Россия ТИВ раҳбари Сергей Лавров билан учрашди. Бу ҳақда Reuters агентлиги хабар берди.
Хабарга кўра, Буюк Британия ташқи ишлар вазири Лиз Трасс Москвага қилган ташрифининг биринчи кунида шаҳардаги номаълум аскар қабрига гулчамбар қўйган ва Александр боғида уни Кремль ҳарбий коменданти қарши олган.
Ташриф мақсадлари ҳақида Трасс хоним маълум вақт аввал Twitter’да шундай ёзганди: «Шу ҳафтада Москвада бўламан ва Украина билан уруш Россия, Европа хавфсизлиги учун фалокатли оқибатлар келтириши мумкинлиги ҳақида қатъий огоҳлантираман».
Қайд этилишича, Буюк Британия ТИВ раҳбари Сергей Лавров билан учрашувда ҳам твитида қайд этган масалаларига яна тўхталиб ўтган.
«Ҳақиқат шундаки, биз Россиянинг Украина чегараси яқинига 100 минг кишилик ҳарбийлар гуруҳини жойлаштирганини инкор эта олмаймиз. Бу Украина суверенитетини бузишга, унинг чегараларини кесиб ўтишган уриниш», – деган Буюк Британия ҳукумати вакили.
Шунингдек, 10 февраль куни Буюк Британия мудофаа вазири Бен Уоллес қироллик разведкасининг Россия бошқа давлат байроғи остида Украинага бостириб киришга уриниши мумкинлиги ҳақида маълумотлар олганини таъкидлаган.
Лиз Трасс ҳамда Сергей Лавров ўртасидаги музокараларда Россия ТИВ раҳбари ушбу ахборотни инкор этган, шу билан бирга, НАТОнинг кенгайиши мамлакатни хавотирга солаётганини айтиб, Москва ва Лондон икки томонлама муносабатларда кун тартибини ўзгартириши зарурлигини билдирган.
«Нонушта вақтида БМТ хавфсизлик кенгашидаги икки томонлама ҳамкорлик масалаларини муҳокама қилиб олишимизга умид қиламан. Россия ва Буюк Британия ушбу ташкилот олий органининг доимий аъзолари ҳисобланади. Менимча, бу борадаги мақсадларимиз муштарак, сунъий равишда юзага келаётган турли муаммолар ҳақида гаплашмасдан БМТ хавфсизлик кенгашидаги асосий вазифаларимизни конструктив мулоқот билан янада мустаҳкамлашимиз зарур», — деган Сергей Лавров.
Лиз Трасс бунга жавобан Лондон Москва билан ҳамкорликка тайёрлиги, аммо Россия раҳбариятининг ҳозирги қарорлари мамлакатнинг технологик, илмий ва ижтимоий потенциалига салбий таъсир кўрсатиши мумкинлигини қайд этган.
Россия ва Беларусь ҳарбийлари «Иттифоқчилик жасорати» қўшма ўқув машғулотларини бошлагани, Украина атрофидаги вазият кескинлашса, Япония Европага газ етказиб беришга тайёрлиги ҳақида хабарлар берилган. Шунингдек, Британия Жануби-Шарқий Европага қирувчи самолётлар ва ҳарбий кемаларини юбориши мумкинлиги хабар қилинганди.
Изоҳ (0)