Эрон Исроил ва АҚШ базаларига зарба бера оладиган ракета яратганини эълон қилди (видео)

Эрон ўзи ишлаб чиқарган ва 1450 километр масофага уча оладиган янги ракетасини намойиш қилди, деб ёзади Reuters.

Яқин Шарқдаги энг йирик ракета дастурларидан бирига эга Эрон, гўёки Исроил ҳудудига етиб бориб, ҳудудда жойлашган АҚШ базаларига зарба беришга қодир Kheibar Shekan номли янги ҳарбий ракетасини намойиш қилди. Эълон қилинган учиш масофаси — 1450 километр.

«Мамлакатда ишлаб чиқарилган ушбу узоқ масофали ракета Ислом инқилоби посбонлари корпуси (ИРГC) томонидан тақдим этилди. У юқори аниқликда, қаттиқ ёқилғи билан ҳаракатланади ва ракета қалқонларини тешиб ўтишга қодир», — дейилади Эрон давлат ОАВлари хабарида.

Reuters агентлигининг қайд этишича, ракетанинг номи рамзий маънога эга. Kheibar Shekan — яҳудийларнинг Хайбар қалъасига ишора бўлиб, у ҳозир Саудия Арабистонида жойлашган. Қалъа  мусулмонлар томонидан 7-асрда эгаллаб олинган.

Эроннинг янги ракета тўғрисидаги баёноти 2015 йилги ядровий келишувни янгилаш бўйича Венада АҚШ билан билвосита музокаралар қайта бошланганидан бир кун ўтиб эълон қилинди.

Эслатиб ўтамиз, Теҳрон ўзининг ракета дастурини АҚШ, Исроил ва бошқа рақибларига қарши муҳим тўхтатувчи восита сифатида кўради. Эрон Ғарбнинг баллистик ракеталар яратишни тўхтатиш ҳақидаги талабларини рад этган.

«Эрон ўзининг баллистик ракета дастурини ривожлантиришда давом этади», — деди Эрон Қуролли кучлари штаби бошлиғи генерал майор Муҳаммад Бағирий янги ракетанинг тақдимоти ўтказилган ИРГC базасидаги тадбирда.

Эслатиб ўтамиз, 2015 йилда Буюк Британия, Германия, Хитой, Россия, АҚШ, Франция ва Эрон ўртасида «Биргаликдаги ҳаракатлар режаси» деб номланадиган келишув имзоланган. Келишув Эроннинг ядровий дастурини чеклаш эвазига Теҳронга нисбатан киритилган санкцияларни бекор қилишни назарда тутган. Кейинчалик Эронни мазкур келишувни қўпол равишда бузганликда айблашди. 2018 йил май ойи бошида АҚШ келишувдан бир томонлама чиқишини эълон қилди ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этди.