Россиянинг Суриядаги Низолашаётган томонларни яраштириш марказида ИШИД ташкилотининг собиқ жангарилари мамлакатни сохта паспортлар ёрдамида тарк этаётгани тўғрисида маълумотлар мавжуд. Бу ҳақда марказ бошлиғи ўринбосари Олег Журавлёвга таяниб, «РБК» хабар берди.
«Ушбу шахслар виза муҳрлари туширилган қалбаки паспортлардан фойдаланиб, АҚШ, Канада ва Европа Иттифоқи мамлакатларига чиқиб кетмоқда», — дейди Журавлёв.
Унинг сўзларига кўра, гап АҚШ қўллаб-қувватлови остида афв этилган жангарилар ҳақида кетмоқда. Илгари улар Суриянинг «курд маъмурияти назорати остидаги қамоқхоналарида» ҳибсда бўлган.
Январь охирларида ИШИД аъзолари Суриянинг Хасеке вилоятидаги қамоқхонага ҳужум уюштириб, у ерда сақланаётган жангариларни озод этишга уринганди. Портловчи қурилмалар ўрнатилган иккита машина ИШИД тарафдорлари бўлган жангарилар сақланаётган қамоқхона дарвозаси олдида портлаган. Шундан сўнг, ҳужум уюштирганлар ва қамоқхона қўриқчилари ўртасида отишга юзага келганди. Курдлар томонидан тарқатилган баёнотда ҳужум қайтарилгани маълум қилинган.
8 февраль куни Россия Ташқи разведка хизмати Америка махсус хизматлари Дамашқ ва Латакиядаги «ухлаётган» экстремистлар эътиборини маҳаллий куч тузилмаларига қарши акцияга, шунингдек, Россия ва Эрон ҳарбий хизматчиларига қаратмоқчи экани тўғрисида хабар берган. Идора маълумотларига кўра, АҚШ шу орқали Суриядаги вазиятни издан чиқармоқчи.
Аввалроқ Россиянинг БМТдаги доимий вакилининг биринчи ўринбосари Дмитрий Полянский Сурияда «қонунсизлик ҳудудлари» шакллангани ва у ерда хорижлик террорчилар мавжудлиги тўғрисида маълум қилганди. У бунда АҚШ ва мамлакатда бўлиб турган бошқа қўшинларни айблаган ва уларни Сурияни тарк этишга чақирган эди.
АҚШ ўзининг ҳарбий контингентини Сурияга 2011 йилда, фуқаролик уруши бошланган вақтда киритган. 2018 йилнинг декабрида АҚШ собиқ президенти Дональд Трамп америкалик ҳарбийлар Сурияни тарк этишини эълон қилган. У ўз қарорини ИШИД жангариларининг асосий қисми яксон этилгани билан изоҳлаган. 2021 йилнинг ёзида, АҚШ ҳукуматининг маълумотларига кўра, Сурияда 900 га яқин америкалик ҳарбий бўлган. Пентагон қўшинларни олиб чиқиб кетишга эрта экани, чунки ИШИДга қарши курашиш давом этаётганини билдирган. 2022 йилнинг февраль бошида АҚШ президенти Жо Байден Сурия шимоли-ғарбида террорчиларнинг етакчиларидан бири Абу Иброҳим ал-Ҳошимий ал-Қураший ўлдирилганини эълон қилди.
Изоҳ (0)