Фото: Дунёдаги энг йирик қора бриллиант рекорд нархда сотилди

Лондондаги аукционда оғирлиги 555,55 қиротга тенг ноёб қора бриллиант 4 292 322 долларга сотилди. Бу ҳақда Sotheby’s кимошди уйи хабар берди.

«Оғирлиги 555,55 қиротга тенг мазкур қора бриллиант бугун 4 292 322 долларга сотилди. Мижоз харидни амалга оширишда криптовалютадан фойдаланишга қарор қилди», — дейилади кимошди уйининг Twitter’даги саҳифасида.

Таъкидлаш керакки, 4 миллион доллардан қимматроққа сотилган мазкур бриллиант аукционлар тарихида қирраланган энг йирик олмос ҳисобланади. У 2006 йилда Гиннеснинг рекордлар китобига ҳам киритилган.

Аукциондан сўнг криптотадбиркор Ричард Херд ижтимоий тармоқлар орқали «Энигма»ни айнан у сотиб олганини маълум қилган. «Тўлов амалга оширилиши ва эгалик ҳуқуқи қўлга киритилиши билан тошнинг номи ‘HEX.com бриллианти’га ўзгартирилади», — дейди у. HEX.com тадбиркор томонидан асос солинган блокчейн-платформадир.

Ушбу қимматбаҳо тошнинг келиб чиқиши ҳақида кўплаб фаразлар мавжуд бўлиб, уларнинг айримларига кўра, олмос Ерга астероид орқали келиб қолган. Тош табиий олмоснинг энг қаттиқ шаклларидан бири бўлган карбонадо турига мансуб. Карбонадо жуда ноёб ва фақатгина Бразилия ва ЖАРдан топилган. Улар таркибида фақат метеоритларда учратиш мумкин бўлган осборнит минерали борлиги сабаб коинотдан келган деб ҳисобланади.

«Энигма»нинг оригинал нусхаси 1990 йиллар охирида харид қилинган ва унинг оғирлиги 800 қиротдан ортиқни ташкил этган. Қимматбаҳо тош қайта ишланмаган, уни ҳозирги шаклига келтириш учун уч йил керак бўлган.

Эслатиб ўтамиз, 2020 йилнинг январида Louis Vuitton модалар уйи дунёдаги энг йирик олмосни 50 миллион долларга сотиб олганди.