Асакада 10 га яқин дарахт кесиб ташланган. Ҳолат юзасидан очилган иш судга оширилди

Андижон вилоятида яна «дарахткушлик» — Асака туманида 10 га яқин кўп йиллик дарахт кесиб юборилган. Бу ҳақда Давлат экология қўмитаси хабар қилди.

Қайд этилишича, дастлабки суриштирув натижаларига мувофиқ, Асака тумани «Амир Темур» маҳалласи ҳудудидаги дарахтларни кесишга қонунчиликда белгиланган тартибда экология органи хулосаси ва маҳаллий давлат ҳокимиятининг рухсатномаси берилмаган.

Мазкур ҳудуддаги дарахтларни хусусий корхона раҳбарияти томонидан кесишга рухсатнома олиш учун Давлат хизматлари марказига мурожаат қилинмаган.

Бош прокуратура матбуот хизматининг маълум қилишича, ҳолат юзасидан «Асака в.л.» хусусий корхона раҳбарига нисбатан Маъмурий жавобгарлик тўғрисидаги кодексининг 79-моддаси (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 1-қисми бўйича тўпланган маъмурий жавобгарликка оид иш ҳужжатлари 9 февраль куни судга юборилган.

Ушбу ҳолатда табиатга 18 миллион 360 минг сўм миқдорида зарар етказилгани аниқланган.