Ўзбекистонда маҳкумлар инсонпарварлик далолатномалари қўлланилмаётгани бўйича омбудсманга мурожаат қилди. Омбудсман эса Ички ишлар вазирлиги ва Олий судга ушбу ҳолатни бартараф этиш юзасидан сўров хати киритган. Бу ҳақда Олий Мажлиснинг Инсон ҳуқуқлари бўйича вакилининг матбуот хизмати хабар берди.
Маълум қилинишича, Олий Мажлиснинг Инсон ҳуқуқлари бўйича вакили «ишонч телефони»га Тошкент вилоятидаги 43, 50 ҳамда Самарқанд вилоятидаги 38-сонли манзил-колонияда жазо муддатини ўтаётган бир гуруҳ маҳкумлар мурожаат қилган. Унда маҳкумлар озодликдан маҳрум қилиш тариқасидаги жазонинг белгиланган қисми ўталган бўлишига қарамай, уларга нисбатан инсонпарварлик далолатномаси қўлланилмаётганини билдирган.
Инсон ҳуқуқлари бўйича вакил ахборот хизмати хабарига кўра, мурожаатлар омбудсман томонидан ўрганилиб, Ички ишлар вазирлиги ва Олий судга ушбу ҳолатни бартараф этиш юзасидан сўров хати киритилиб, ижроси назоратга олинган. Натижада Жиноят ишлари бўйича тегишли судларнинг ажрими билан 48 нафар маҳкумга тайинланган озодликдан маҳрум қилиш тариқасидаги жазо ахлоқ тузатиш ишларига алмаштирилган.
Шунингдек, 3 нафар маҳкумга тайинланган озодликдан маҳрум қилиш жазоси шартли равишда озод этишга ва 2 нафар маҳкумга тайинланган озодликдан маҳрум қилиш жазоси озодликни чеклаш жазосига алмаштирилган. Қолган 8 нафар маҳкумнинг интизомий жазоси мавжуд бўлгани сабабли инсонпарварлик далолатномаси қўлланилиши рад этилган.
Маълумот учун, Жиноят кодексининг 73, 74, 89-моддаларида (жазони ўташдан муддатидан илгари шартли озод қилиш, жазони ўташда муддатидан илгари шартли озод қилиш ёки енгилроғи билан алмаштириш тартиби белгиланган.
Ҳаракатланиш эркинлиги чекланган шахслар сақланадиган жойлар, жумладан, гауптвахта, интизомий қисм, тергов ҳибсхоналари, жазони ижро этиш колониялари ва мажбурий даволаш муассасаларида сақланаётган шахслар ва уларнинг яқин қариндошлари омбудсманга 1096 қисқа рақамли «ишонч телефони» орқали мурожаат қилиши мумкин. Тергов ҳибсхоналари ва жазони ижро этиш муассасаларида сақланаётган шахслар ушбу муассасаларга ўрнатилган «Омбудсман қутилари»га мурожаатларини ташлаш имконига эга. Мазкур қутилар фақат омбудсман ходимлари томонидан очилади.
Жазо ўтаётган шахсларнинг яқин қариндошлари эса омбудсманга инфо_омбудсман.uzb@umail.uz электрон почтаси орқали мурожаат йўллаши мумкин.
Эслатиб ўтамиз, 2021 йилнинг октябрида Тошкентда ўтказилган «Ўзбекистонда миллий превентив механизмни халқаро стандартлар асосида ривожлантириш истиқболлари» мавзусидаги халқаро конференцияда инсон ҳуқуқлари бўйича вакил Феруза Эшматова маҳкумлардан омбудсманга келиб тушаётган мурожаатларга ҳам тўхталиб ўтганди. Ўшанда у «ҳозирги кунда жазони ижро этиш муассасаларида мен ўзим қийноқ ҳолатларини деярли учратганим йўқ», деганди.
Изоҳ (0)