Ижтимоий тармоқларда Бухоро вилоятида оммавий муштлашув содир бўлгани тасвирланган видео тарқалди. Ҳолатни ўрганган вилоят ИИБ жанжал икки қишлоқ фуқаролари ўртасида юзага келганини маълум қилди.
Аниқланишича, 5 февраль куни тахминан соат 16:00 ларда Жондор тумани «Нурафшон» маҳалласининг «Мохон» қишлоғида жойлашган стадионда «Тобагар» ва «Чандир» қишлоқлари фуқаролари ўзаро футбол ўйини ўйнаган.
Таъкидланишича, футбол ўйинининг ташкил қилиниши, ўйин давомида содир бўлган жанжал ва бу жараёнда бирор бир фуқаронинг тан жароҳати олгани тўғрисида фуқароларнинг ўзи ёки бошқа шахслар томонидан Ички ишлар бошқармасининг 102 автоматлаштирилган тизимига, тиббий муассасаларга, 103 қисқа рақамли тез ёрдам хизматига, туман ИИБ навбатчилик қисми ва ҳудудий профилактика инспекторига мурожаат келиб тушмаган.
«Ҳолатга ва ушбу фуқароларнинг шахсига аниқлик киритиш ҳамда уларнинг хатти-ҳаракатларига қонуний баҳо бериш мақсадида Бухоро вилояти Ички ишлар бошқармаси ҳамда Жондор тумани Ички ишлар бўлими ходимлари томонидан тезкор суриштирув ва терговга қадар текширув ҳаракатлари олиб борилмоқда», — дейилади хабарда.
Аввалроқ Сурхондарёда ер талашган фуқаролар ўртасида оммавий мушлацҳув содир бўлгани, Тошкентда мактаб ўқувчилари ўртасида оммавий муштлашув содир бўлгани ҳақидаги хабарга изоҳ берилгани, Чилонзордаги кафеда жанжал кўтариб, ички ишлар ходимига қўл кўтарган шахслар ҳибсга олингани, Нукусда бўлиб ўтган фестивалдан сўнг жанжал содир бўлгани тўғрисида хабар берилганди.
Изоҳ (0)