Самарқанд вилоятининг Ургут туманидан ўтган М-39 автомобиль йўлининг Тахтақорача довони 6 февраль куни соат 17:30 дан автомобиллар ҳаракати учун вақтинча ёпилганди. Самарқанд вилояти ИИБнинг маълум қилишича, айни вақтда довон йўли автомобиллар ҳаракати учун очилган.
«Тахтақорача довонида автомобиль йўлини қордан тозалаш ишлари олиб борилиб, айни вақтларда довон йўлида транспорт воситаларининг ҳаракатланиши учун рухсат берилди. Барча ҳайдовчилардан тезлик меъёрини оширмасдан, оралиқ масофани сақлаб ҳаракатланишларини сўраймиз», — дейилади хабарда.
ФВВ маълумотларига кўра, вазирлик тегишли хизматлар билан йўлга қум-туз аралашмасини сепиш ва қордан тозалаш ишларини олиб борган ва 7 февраль куни соат 08:30 да Тахтақорача довони автомобиллар ҳаракати учун қайта очилган.
Эслатиб ўтамиз, «Ўзгидромет» 6 февраль, якшанба куни тоғолди ва тоғли ҳудудларда баъзи жойларда ёғингарчилик кучли бўлиши мумкинлигини, тоғли автомобиль йўлларда қор уюмлари ва кўриниш ёмонлашиши кутилаётганини маълум қилганди. Шу куни Самарқанд ва Қашқадарё вилоятларини боғловчи Тахтақорача довонида кучли қор ёғди. Қалин қор туфайли соат 11:00 дан Қашқадарё вилоятининг Китоб туманидан ўтган М-39 автомобиль йўлининг Тахтақорача довони автомобиллар ҳаракати учун вақтинча ёпилди. Қисқа муддатга ёпилган йўл 6 февраль куни соат 11:53 да қайта очилди.
Изоҳ (0)