Қамчиқ довонида қолиб кетган транспорт воситалари ва фуқароларга амалий ёрдам кўрсатилди, деб хабар бермоқда Фавқулодда вазиятлар вазирлиги.
Маълум қилинишича, 6 февраль куни соат 19:05 да «Қамчиқ» Махсус қидирув, ёнғин-қутқарув бошқармаси навбатчи-диспетчерига Қамчиқ довонидан ўтган А-373 Тошкент—Ўш автомобиль йўлининг 242-километрида шимолий айланма йўлида об-ҳавонинг кескин ўзгариши натижасида тепаликда қолиб кетган 14 нафар фуқарога ёрдам кераклиги ҳақида маълумот келиб тушган.
Воқеа жойига зудлик билан «Қамчиқ» Қутқарув отрядидан махсус техника ҳамда қутқарувчи ходимлар чиқиб, тоғда қолиб кетган 14 нафар фуқаро ҳамда уларнинг транспорт воситаларини пастга олиб тушиш ҳамда эвакуация қилиш ишлари амалга оширилган.
Қутқарувчилар соат 20:10 да барча фуқароларни соғ-омон пастга олиб тушиб, манзилларига юборишда амалий ёрдам кўрсатган. Ҳодиса натижасида ҳеч ким тан жароҳати олмаган.
Эслатиб ўтамиз, ФВВ 6—7 февраль кунлари Қамчиқ довонига қор ёғиши мумкинлиги сабаб ҳайдовчиларни огоҳлантирганди.
«Қамчиқавтойўл» матбуот хизмати хабарига кўра, А-373 М-39 Гулистон—Бўка—Ангрен—Қўқон—Андижон орқали-Ўш автомобиль йўлининг Қамчиқ довонидан ўтган қисми 171-263 километрлар оралиғида қор ёғиши давом этмоқда. Довонда транспорт воситаларининг бетўхтов икки томонлама ҳаракатланиши таъминлаш учун йўлларни қордан тозалаш ишлари олиб борилмоқда.
Самарқанд вилоятининг Ургут туманидан ўтган М-39 автомобиль йўлининг Тахтақорча довонида ҳам 6 февраль куни қалин қор ёғди. Дастлаб қисқа муддатга — соат 11:00 дан 11:53 гача ёпилган йўл соат 17:30 дан бошлаб автомобиллар ҳаракати учун яна ёпилди.
Мавзуга доир: Видео: Тахтақорача довонида ёғаётган кучли қор
Изоҳ (0)