Ijtimoiy tarmoqlarda Buxoro viloyatida ommaviy mushtlashuv sodir bo‘lgani tasvirlangan video tarqaldi. Holatni o‘rgangan viloyat IIB janjal ikki qishloq fuqarolari o‘rtasida yuzaga kelganini ma’lum qildi.
Aniqlanishicha, 5-fevral kuni taxminan soat 16:00 larda Jondor tumani “Nurafshon” mahallasining “Moxon” qishlog‘ida joylashgan stadionda “Tobagar” va “Chandir” qishloqlari fuqarolari o‘zaro futbol o‘yini o‘ynagan.
Ta’kidlanishicha, futbol o‘yinining tashkil qilinishi, o‘yin davomida sodir bo‘lgan janjal va bu jarayonda biror bir fuqaroning tan jarohati olgani to‘g‘risida fuqarolarning o‘zi yoki boshqa shaxslar tomonidan Ichki ishlar boshqarmasining 102 avtomatlashtirilgan tizimiga, tibbiy muassasalarga, 103 qisqa raqamli tez yordam xizmatiga, tuman IIB navbatchilik qismi va hududiy profilaktika inspektoriga murojaat kelib tushmagan.
“Holatga va ushbu fuqarolarning shaxsiga aniqlik kiritish hamda ularning xatti-harakatlariga qonuniy baho berish maqsadida Buxoro viloyati Ichki ishlar boshqarmasi hamda Jondor tumani Ichki ishlar bo‘limi xodimlari tomonidan tezkor surishtiruv va tergovga qadar tekshiruv harakatlari olib borilmoqda”, — deyiladi xabarda.
Avvalroq Surxondaryoda yer talashgan fuqarolar o‘rtasida ommaviy mushlatshuv sodir bo‘lgani, Toshkentda maktab o‘quvchilari o‘rtasida ommaviy mushtlashuv sodir bo‘lgani haqidagi xabarga izoh berilgani, Chilonzordagi kafeda janjal ko‘tarib, ichki ishlar xodimiga qo‘l ko‘targan shaxslar hibsga olingani, Nukusda bo‘lib o‘tgan festivaldan so‘ng janjal sodir bo‘lgani to‘g‘risida xabar berilgandi.
Izoh (0)