Шавкат Мирзиёев 4 февраль куни Хитойнинг Пекин шаҳрида XXIV қишки Олимпия ўйинларининг тантанали очилиш маросимида иштирок этгани тўғрисида хабар берилганди. Давлат раҳбарининг матбуот котиби Шерзод Асадовнинг маълум қилишича, Шавкат Мирзиёев Пекинда қатор давлатлар ва халқаро ташкилотлар раҳбарлари билан мулоқот қилган.
«Ташриф билан Пекинда бўлиб турган президент Шавкат Мирзиёев қишки Олимпия ўйинларининг очилишига бағишланган тадбирлар доирасида қатор давлатлар ва халқаро ташкилотлар раҳбарлари билан мулоқот қилди», — дейилади хабарда.
Эълон қилинган суратлардан кўриш мумкинки, Ўзбекистон президенти БМТ бош котиби Антониу Гутерриш, Қозоғистон, Қирғизистон, Тожикистон ҳамда Миср президентлари билан мулоқот қилган.
Маълумот учун, XXIV қишки Олимпия ўйинларининг тантанали очилиш маросими хорижий давлатлар етакчилари, расмий делегациялар ва халқаро ташкилотлар раҳбарлари иштирокида Пекиндаги «Қуш уяси» миллий стадионида ўтказилди.
Маросимдан сўнг Миллатлар паради бўлиб ўтган. Қишки Олимпиадада иштирок этаётган мамлакатларнинг спорт делегациялари, шу жумладан, Ўзбекистон жамоаси стадион бўйлаб юрди. Ўйинларда Ўзбекистон номидан қатнашаётган тоғ чанғичиси Комилжон Тўхтаев мамлакат байроғини кўтариб ўтган.
Изоҳ (0)