Буюк Британия ҳукуматини 2016—2019 йилларда бошқарган Тереза Мей НАТОнинг янги бош котиби лавозимига номзодлар қаторига киритилди. Бу ҳақда альянсдаги манбаларига таяниб, DPA агентлиги хабар берди.
Мейдан ташқари НАТО раҳбарлигида Нидерландия бош вазири Марк Рютте, Эстония бош вазири Кая Каллас, Руминия президенти Калус Ёхханис, шунингдек, Европа Иттифоқининг хорижий ишлар ва хавфсизлик сиёсати бўйича собиқ олий вакили Федерика Могерини номзодлик қилади.
Тахминларга кўра, НАТОнинг янги бош котиби 2022 йилнинг июнидаги саммитида сайланади. Унинг номзодини альянсга аъзо 30 мамлакатнинг барчаси маъқуллаши керак.
Норвегия собиқ бош вазири Йенс Столтенберг НАТОга 2014 йилдан буён раҳбарлик қилиб келмоқда. У 1990 йилларда аввал Норвегиянинг савдо ва энергетика вазири, сўнгра молия вазири бўлиб ишлаган. Икки марта мамлакат ҳукуматини бошқарган. 4 февраль куни у Норвегия Марказий банки раҳбари этиб тайинлангани маълум бўлди. Столтенберг янги лавозимдаги фаолиятини 2022 йил сентябрдан бошлайди.
Аввалроқ Хорватия ва Литванинг собиқ президентлари Колинда Грабар-Китарович ва Даля Грибаускайте ҳамда Эстониянинг амалдаги президенти Керсти Калюлайд НАТО бош котиби лавозимига номзодлик қилиши мумкинлиги айтилганди.
Изоҳ (0)