Американинг Bloomberg агентлиги 4 февраль куни ўзининг сайти орқали «Россия Украинага бостириб кирди» сарлавҳасини эълон қилиб юборди, деб хабар беради «ТАСС». Кейинроқ агентлик хатосини тан олиб, сарлавҳани ўчириб ташлаган.
«Биз кўплаб сценарийларга сарлавҳа тайёрлаймиз ва ‘Россия Украинага бостириб кирди’ сарлавҳаси маҳаллий вақт билан соат 16:00 ларда сайтимиз орқали тасодифан эълон қилиб юборилди. Биз ушбу хатомиздан чуқур афсусдамиз», — дейилади агентлик сайтида эълон қилинган хабарда.
Таъкидланишича, агентлик раҳбарияти бу каби тушунмовчилик нима сабабдан юзага келганини аниқламоқда.
Украина билан чегарада Россия қўшинларининг тўплангани ҳақидаги маълумотлар октябрь ойида ғарб ОАВларида пайдо бўлишни бошлаган. Ноябрь ойи ўрталарида Украина президенти Владимир Зеленский чегарада 100 минг Россия қўшини борлигини маълум қилган. АҚШ Давлат котиби ўринбосари Виктория Нуланд Россиянинг Украинага «бостириб кириши» 2022 йил бошида содир бўлиши мумкинлигини айтган.
Москва бу маълумотларни рад этиб, Украинадаги ҳарбий ҳаракатларга тайёргарлик ҳақидаги хабарларни «қуруқ, асоссиз кескинлик» деб атамоқда. Қолаверса, Россия ғарб давлатларидан НАТОнинг шарққа томон кенгаймаслиги, Украина эса бу ташкилотга қабул қилинмаслиги ҳақида кафолат талаб қилган.
Россия президентининг матбуот котиби Дмитрий Песков Америка расмийларининг баёнотини изоҳлар экан, АҚШ Россиянинг Украинага бостириб кириш режалари ҳақида биринчи марта гапирмаётгани, аммо шу пайтгача ҳеч нарса бўлмаганини айтди. «Бу биринчи даъво эмас. Илгари ҳам шунга ўхшаш гаплар айтилганди. Лекин бундан ҳеч нарса чиқмаган», — дейди Кремль вакили.
Изоҳ (0)