Тошкент ҳайвонот боғида 28 январь куни она 3 ёшли қизини Зузу лақабли айиқ қафасига ташлаб юборди. Ҳатто ўз болаларини еб қўйиши ёки ўлдириши мумкин бўлган йиртқич, чангалига тушган қизчани ғажиб ташламади, унга тегмади. Эсласангиз, «Маша ва айиқ» мультфильми қаҳрамони айиқ қизчага меҳрибонлик кўрсатиб, боланинг шўхликларини кўтаради. Бугун ҳаётда ҳам биз йиртқич дея атайдиган айиқ қаҳрамонга айланди. У ожиз ҳолда қолган инсон боласига ҳамла қилмади. «Дарё» нашри меҳрибон Зузу ҳақида репортаж тайёрлади.
Ҳайвонот боғининг Йиртқичлар бўлими мудири Нодир Баҳромовнинг айтишича, Зузу кавказ қўнғир айиғи турига киради. У 2016 йилда туғилган. Тошкентга 4 йил аввал Озарбайжондаги Боку ҳайвонот боғидан олиб келинган.
«Ҳайвонот боғимизга 2017 йилда Зузу (эркак) ва бир урғочи айиқ насл олиш учун олиб келинган. Бу айиқлар энди вояга етди. Жорий йилнинг ёзида иккисини бирга қўшиб юбориш ниятимиз бор.
Зузу лақабли айиғимизнинг озиқ-овқат рационига асосан, сабзовот, мева, гўшт, балиқ ва каша маҳсулотлари киради. Гўшт маҳсулотларидан мол гўштини балиқ билан қайнатиб кашасига қўшиб берамиз. Зузу энг яхши кўрган маҳсулот — пиширилган гўшт ҳисобланади.
Ўзбекистон ёввойи табиатида оқ тирноқли айиқлар кўп учрайди. Унинг илмий номи — Тяншан айиғи. Лекин иккиси ҳам қўнғир айиқ турига киради. Айиқлар кўп умр кўрадиган жонивор бўлиб, 25-30 йилгача яшайди. Бундай турдаги айиқларнинг табиатдаги умри қисқароқ, ҳайвонот боғида боқилганда узоқроқ давом этади. Айиқ ухлаши учун иккита сабаб керак: совуқ тушиши ва ейдиган озуқаси камайиб кетиши», — деди ходим.
Айни пайтда қизча билан содир бўлган воқеа сабабли ҳайвонот боғига келувчилар сони ошган. Кўпчилик Зузуни ўз кўзи билан кўриш иштиёқида. Нодир Баҳромов боғ очилганидан бери (24 йил ичида) бу каби хавфли вазият юз бермаганини айтди. Ҳозирда хавфсизлик чоралари кучайтирилиб, йиртқич ҳайвонлар тўсиқларини инсон бўйи етмайдиган даражага кўтарилмоқда. Зузунинг қафаси ҳам аввалгидан юқорига жойлаштирилди.
«Қизча билан содир бўлган воқеа аслида жуда мудҳиш. Лекин ҳайвонот боғимизга ташриф буюрувчиларнинг кўп қисми Зузу айиғини ўз кўзи билан кўриш учун дам олиш ва душанба кунлари келди. Бизда ҳайвонот боғи ходимлари йиртқич ҳайвонлари билан алоқа (контакт) ўрнатмайди ва бу мумкин эмас.
Айиғимизнинг қизчага тегмагани бизнинг ҳам, унинг ҳам бахти. Хавфсизлик чораларини кўрган эдик, лекин бунақа ҳолат бўлишини ўйламагандик. Эндиликда шундай хавфларнинг олдини олиш учун йиртқичлар тўсиқларини одам бўйи етмайдиган баландликка кўтаряпмиз. Авваллари ҳайвонлар ташқарига чиқмаслиги учун қафасларининг тўсиқларини қилган бўлсак, энди инсонлар қафасга ўтмаслиги учун қафасдаги қияликни ташриф буюрувчилар тарафга қийшайтирдик», — деди ҳайвонот боғи бўлим мудири.
Нодир Баҳромовнинг таъкидлашича, ҳайвонот боғида йиртқич ҳайвон инсонга қаттиқ зарар етказса ёки ўлдирса, укол билан ухлатилиб, ўлдирилади.
«Йиртқичлар инсон гўштини ейдиган бўлса, унга ўрганиб қолади ва ҳайвон гўштини емай қўяди. Кейин у одамлар яшайдиган жойга бориб уларни ейишни бошлайди. Шунинг учун ҳайвонот боғлари ва циркларда йиртқич одам гўштини еган тақдирда ухлатилади», — дея қўшимча қилди боғ ходими.
Айиқ қафасига ташлаб юборилган қизча воқеаси
Эслатиб ўтамиз, 28 январь куни Тошкент ҳайвонот боғида аёл омма олдида ўз қизчасини айиқ қафасига ташлаб юборгани, 5 метр чуқурликдаги зовурга йиқилган бола бошидан жароҳатлангани, айиқ уни ҳидлаб кўргани ва зарар етказмай нари кетгани хабар қилинганди. Кейин бола ҳайвонот боғи ходимлари томонидан волердан олиб чиқилган ҳамда шифохонага олиб борилган. Соғлиқни сақлаш вазирлиги қизалоқ касалхонада барча зарур тиббий кўриклардан ўтказилганини маълум қилган. «Қизча енгил шок ҳолатида бўлган, баландликдан йиқилиш оқибатида очиқ бош мия жароҳати ва бош мия чайқалиши кузатилган. Ҳозирда унинг аҳволи яхши, тиббиёт ходимлари назоратида», — дейилганди ССВ хабарида.Мавзуга доир:
Ҳайвонот боғи вакиллари ҳолат юзасидан қўшимча изоҳ бериб, аслида эркак айиқ ҳатто ўз болалари учраганда еб қўйиб, ўлдирадиган даражада бўлиши, аммо қизчани боши қонаган ҳолатда ҳам айиқ унга тегмагани чинакам мўъжизалигини таъкидлаган.
Маҳалла ва оилани қўллаб-қувватлаш вазирлиги берган маълумотга кўра, аёл турмушдаги келишмовчиликлар сабабли руҳий тушкунликка тушиб қолгани учун боласини йиртқич қафасига ташлаб юборган.
Айни пайтда қизчанинг аҳволи яхши ва унинг даволаниши учун тиббий харажатлар ҳайвонот боғи ҳисобидан тўланмоқда. Қолаверса, қизча ва унинг акасига Тошкент ҳайвонот боғига бир умр бепул кириш имконияти берилган.
Изоҳ (0)