3 февраль куни Тошкентнинг Юнусобод туманида дарахтларнинг таги бетонлаб кетилгани тўғрисида хабар берилганди. Экология ва атроф-муҳитни муҳофаза қилиш давлат қўмитасининг маълум қилишича, ҳуқуқ-тартибот органлари томонидан мазкур ҳудудда навбатчилик ташкил этилади.
Маълум қилинишича, Давлат экология қўмитаси раиси Нарзулло Обломурадов жойига чиқиб, ҳолат билан яқиндан танишган. Экология, Экопатруль ва Миллий гвардия ходимлари ҳамкорлигида мазкур ҳудудда навбатчилик ташкил этилиб, 24 соат назоратга олиш вазифаси топширилган.
«Айни дамда мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилиш органларига юборилди», — дейилади хабарда.
Эслатиб ўтамиз, 2021 йилнинг декабрь ойида айнан шу ҳудудда 18 туп дарахтнинг 10 тупи номаълум шахслар томонидан ярмигача арралаб кетилган эди. 2022 йилнинг 10 январга ўтар кечаси Тошкент шаҳрининг Юнусобод туманида номаълум шахслар 4 туп элдор қарағайини кесиб ташлаганди. Кейинроқ 10 та қарағай арралаб кетилгани бўйича жиноят иши қўзғатилган эди. Шундан кейин зарар етказилган дарахтлар маҳалла аҳолиси ҳамда экологлар томонидан скотч билан ўралган.
Изоҳ (0)