Дам олиш куни аномал илиқ кескин совуқ билан алмашади, деб хабар бермоқда «Ўзгидромет».
Маълум қилинишича, 4 февраль, жума куни Ўзбекистон ҳудудига Туркманистон ҳудудларидан жуда илиқ ва қуруқ ҳаво кириб келиши кутилмоқда. Ҳарорат фони кўп йиллик қийматлардан 5-7 даражага юқори бўлади. Кундуз куни ҳаво 12-14 даража илиққача, баъзи жойларда 16-18 даража илиққача исийди.
Шанба куни илиқ ҳаво массасининг кириб келиши кучаяди. Кундуз кунги ҳарорат 14-17 даража илиққача, баъзи жойларда 20-22 даража илиққача кўтарилади, кечаси бироз совуқ сақланиб туради. Республика ҳудудининг катта қисмида ёғингарчилик кутилмайди, фақат республиканинг шимолий ҳудудларига Волга бўйи ҳудудларидан нам ҳаво массаси кириб келиши прогноз қилинмоқда. Қорақалпоғистонда ва Хоразм вилоятида баъзи жойларда ёмғир ёғади.
Якшанба куни совуқ ҳаво кириб келиши мамлакатнинг барча ҳудудларини қамраб олади, об-ҳаво кескин ёмонлашади. Ресублика бўйича ёмғир ёғади, шимолда қор аралаш бўлиши мумкин. Ҳарорат кундуз куни 4-9 даража илиққача, шимолда 0-5 даража илиққача пасаяди.
4—6 февралда республика бўйича баъзи жойларда шамол кучайиши кутилмоқда, айрим жойларда чанг тўзон кузатилади, жумладан:
- 4 февралда Қорақалпоғистонда, Хоразм, Навоий, Тошкент вилоятларида 18-23 метр/секундгача;
- 5—6 февралда Қорақалпоғистонда, Хоразм, Бухоро, Навоий, Тошкент, Самарқанд, Жиззах, Сирдарё, Қашқадарё, Сурхондарё вилоятларида 18-23 метр/секундгача, Навоий, Тошкент, Жиззах вилоятларининг айрим жойларида эса 25-28 метр/секундгача кучайиши мумкин.
«Ўзгидромет» ҳафта охирларида ёғингарчилик (ёмғир, қор), шамол тезлиги кучайиши, чанг тўзони кузатилиши ҳақида аввал ҳам огоҳлантирганди. Фавқулодда вазиятлар вазирлиги аҳолини хавфсизлик қоидаларига риоя қилишга чақирган.
Изоҳ (0)