АҚШнинг марказий, шарқий ва жанубий қисмларида истиқомат қилувчи 285 мингдан ортиқ фуқаро электр энергиясисиз қолди. Бу ҳақда Қўшма Штатлардаги электр таъминотидаги носозликларни кузатиб борувчи PowerOutrage.US портал маълумотларида қайд этилган.
Axios нашри маълумотларига кўра, бўрон оқибатида мазкур ҳудудларга қор ва музлик ёмғир ёғган. Дарахтлар ва электр узатиш тармоқлари музлаб қолган бўлиб, бу ўз навбатида электр энергияси таъминотининг оммавий ўчишига сабаб бўлган.
Ноқулай об-ҳаво автомобиль йўллари ва авиапарвозларга ҳам жиддий зарар етказган. 3 февраль ҳолатига кўра, АҚШда 6 мингдан ортиқ авиарейслар бекор қилинган.
Техас, Канзас ва Оклахоманинг айрим қисмларидаги мактабларда 3—4 февраль кунлари дарслар бекор қилинган. Ню-Мексико баъзи судлар ёпилган. Ноқулай об-ҳаво ҳақида огоҳлантиришни Ню-Мексикодан Канадагача 110 миллиондан ортиқ одам олган.
Бўрон Алабамада кучли ёғингарчилик ва торнадони ҳосил қилган бўлиб, оқибатда камида тўрт киши жабрлангани айтилмоқда.
Аввал АҚШга кучли қор бўронлари ёпирилаётгани сабабли 5 мингга яқин авиарейсларнинг бекор қилингани ҳақида хабар берилган. Шунингдек, Бразилияда кучли ёғингарчилик 20 кишининг ўлимига сабабчи бўлгани, ЖАРдаги тропик бўрон 70 кишини ҳалок қилгани, Туркиядаги қор беш мингтадан зиёд йўлни ёпиб қўйгани хабар қилинган.
Изоҳ (0)