Буюк Британияда коронавирусга қарши ҳисоб бўйича бешинчи вакцина — Американинг Novavax компаниясининг Нуваховид дори воситасидан фойдаланишга рухсат берилди. Бу ҳақда Дори воситалари ва тиббиёт маҳсулотларини назорат қилиш агентлигига (МHRА) таяниб, «ТАСС» хабар берди.
Регуляторнинг таъкидлашича, дори воситаси «хавфсизлик, сифат ва самарадорликнинг талаб қилинадиган стандартларига мувофиқлиги синчковлик билан кўриб чиқилганидан сўнг», 50 мингга яқин одам иштирок этган иккита йирик клиник синов натижаларини таянган ҳолда тасдиқланган.
Мазкур вакцина 2021 йилнинг декабрида Европа дори воситалари агентлиги (EMA) ва Жаҳон соғлиқни сақлаш ташкилоти (ЖССТ) томонидан қўллаш учун тавсия этилганди. Нуваховид ЖССТ томонидан пандемия шароитида қўллашга рухсат берилган 10-вакцина ҳисобланади. Синовлар давомида у COVID-19 га қарши 90,4 фоиз самарадорликни кўрсатган.
Мазкур дори воситаси Буюк Британияда ҳозирги кунда фойдаланилаётган коронавирусга қарши бошқа вакциналардан фарқ қилади, чунки унда рекомбинант оқсилга асосланган технологиядан фойдаланилган бўлиб, ундан узоқ йиллардан бери гепатит Б каби бошқа касалликларга қарши вакциналарни яратишда фойдаланиб келинади.
Бунга қадар Буюк Британияда тўртта турдаги вакцинадан фойдаланишга рухсат берилганди — AstraZeneca, Pfizer, Moderna ва Janssen (Johnson&Johnson бўлинмаси) компанияларининг дори воситаларидан.
Аввалроқ Буюк Британия ва Норвегия эмланганлар учун карантинни бекор қилгани, Бразилияда Pfizer вакцинаси билан эмланган 10 ёшли боланинг юраги тўхтаб қолгани, Австрия Евроиттифоқ мамлакатларидан биринчи бўлиб мажбурий вакцинацияни жорий қилиши тўғрисида хабар берилганди.
Изоҳ (0)