“Ida” to‘foni tufayli Nyu-Yorkda rekord miqdorda yog‘ingarchilik yog‘di. Metro suv ostida qoldi, favqulodda vaziyat rejimi e’lon qilindi (foto va video)

Bir necha kun davomida Luiziana shtatiga yopirilib, unga zarar yetkazgan “Ida” dovuli sentabr boshida Nyu-Yorkka yetib keldi, deb yozadi Meduza.

Shaharda bir necha soat ichida rekord miqdorda yog‘ingarchilik yog‘ib, ko‘chalar va hatto metro bekatlari suv ostida qoldi. Favqulodda vaziyatlar xizmati xodimlari avtomobillarda qamalib qolgan odamlarni qutqarishiga to‘g‘ri keldi. Shahar tashqarisiga qatnaydigan poyezdlar harakati to‘xtatildi.

Nyu-York meri Bill de Blazio shaharda “tarixiy tabiiy hodisa” tufayli favqulodda vaziyat rejimini e’lon qildi. Shoshilinch xizmatlar mashinalaridan boshqa barcha avtomobillarning ertalabki 05:00 gacha ko‘chaga chiqishi taqiqlandi, aholidan uydan chiqmaslik qat’iy so‘ralmoqda.

So‘nggi ma’lumotlarga ko‘ra, Nyu-Yorkda suv toshqini oqibatida kamida sakkiz kishi halok bo‘lgan. “Ida” dovulidan qo‘shni shtatlar ham zarar ko‘rdi. Nyu-Jersi shahridagi eng yirik aeroport — Nyuark suv bosgan terminal tufayli o‘z faoliyatini vaqtinchalik to‘xtatdi, Pensilvaniyada esa qutqaruvchilar toshqin ostida qolgan maktab avtobusidan 41 kishini evakuatsiya qildi.