Россия президенти Владимир Путин 3 февраль куни кечаси Франция президенти Эммануэль Макрон билан телефон орқали мулоқот қилди. Бу ҳақда Кремль матбуот хизмати хабар берди.
«Украина атрофидаги вазият ва Россиянинг хавфсизлиги учун узоқ муддатли ҳуқуқий кафолатларни ишлаб чиқиш бўйича Россия ташаббуси билан боғлиқ масалалар юзасидан мулоқот давом этди», — дейилади хабарда.
Кремлдагиларнинг таъкидлашича, Владимир Путин суҳбат давомида «яна Киев раҳбариятининг провакацион баёнотлари ва ҳаракатларига эътиборни қаратган».
Елисей саройи ҳозирча Путин ва Макрон ўртасида бўлиб ўтган мулоқотга изоҳ бермаган.
Россия ва Франция президентлари бир ҳафта ичида учинчи бор телефон орқали мулоқот қилмоқда. Бундан олдинги суҳбатлар 28 ва 31 январь кунлари бўлиб ўтганди. Иккала ҳолатда ҳам Путин ва Макрон Украина атрофидаги вазият ва Россиянинг хавфсизлик кафолатлари бўйича таклифларини муҳокама қилган.
2021 йилнинг декабрида Россия Украина чегарасида ўз қўшинларини тўплаётгани фонида АҚШ ва НАТОга Европада ўзаро хавфсизлик кафолатларини муҳокама қилганди. Москва НАТОдан ўз таркибига янги аъзоларни, биринчи навбатда, Украинани қўшмасликни, шунингдек, қўшинларини альянсга 1997 йилдан кейин қўшилган мамлакатлар ҳудудига жойлаштирмасликни талаб қилган.
27 январь куни НАТО Россиянинг хавфсизлик кафолатлари бўйича таклифларига ёзма равишда жавоб қайтарди. Унда таъкидланишича, альянс очиқ эшиклар сиёсати ва суверен мамлакатларнинг НАТОга кириш ҳуқуқини ўзгартириш бўйича муросага тайёр эмас.
Аввалроқ Буюк Британия бош вазири Борис Жонсон Киевга ташриф буюриб, Украина президенти Владимир Зеленский билан музокаралар ўтказганди. Жонсон «россиялик аскарнинг оёғи Украина чегарасини кесиб ўтган дақиқада» Британия Россияга қарши санкциялар қўллашига ваъда берган.
Изоҳ (0)