АҚШ президенти Жо Байден америкалик ҳарбийларнинг Сурия шимоли-ғарбида ўтказилган махсус операцияси давомида ИШИД етакчиси Абу Иброҳим ал-Ҳошимий ал-Қураший ўлдирилганини эълон қилди. Тегишли баёнот Оқ уй сайтида чоп этилган. Reuters ИШИД етакчиси йўқ қилинган жойдан олинган кадрларни намойиш қилди.
Байден айтганидек, «америкаликларнинг барчаси операциядан соғ-саломат қайтди». АҚШ маъмуриятининг маълум қилишича, ИШИД етакчиси ўзини портлатиб юборган, шунингдек, унинг бир неча оила аъзолари ҳалок бўлган.
Пентагон матбуот котиби Жон Кирбининг сўзларига кўра, операция давомида камида уч нафар тинч аҳоли вакили — ИШИД етакчисининг рафиқаси ва унинг болалари ҳалок бўлган. Уларнинг ўлимига америкалик ҳарбийлар эмас, жангариларнинг ўз хатти-ҳаракатлари сабаб бўлгани ҳақида АҚШ «ишончли далилларга эга», деди Кирби. Унинг қўшимча қилишича, ал-Қурайший яширинган бинодан ўндан ортиқ тинч аҳоли олиб чиқилган.
Ироқ армияси бош қўмондони матбуот котиби Яҳё Расул ИШИД етакчисининг жойлашуви Ироқ разведкаси томонидан тақдим этилган маълумотлар туфайли аниқланганини таъкидлади.
АҚШ Давлат котиби Энтони Блинкен ал-Қурайшининг ўлимини «ИШИДни йўқ қилиш учун глобал курашдаги муҳим ғалаба» деб атади.
Ал-Қурайши ИШИДни 2019 йилнинг октябрь ойидан бошқарган. У аввалги етакчи Абу Бакр ал-Бағдодий Суриянинг Идлиб вилоятида ўтказилган АҚШ махсус амалиётида ўлдирилганидан кейин раҳбарликни қўлга олган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)