Буэнос-Айрес яқинида кокаиндан заҳарланиш оқибатида камида 20 киши вафот этди ва 74 киши шифохонага жойлаштирилди, деб хабар беради Todo Noticias телеканали.
Маълум қилинишича, шифохонага ётқизилган фуқароларнинг 18 нафари ўпкани сунъий нафас олдириш аппаратига уланган. Расмийларнинг огоҳлантиришича, қурбонлар сони ортиши мумкин.
Буэнос-Айрес провинцияси Соғлиқни сақлаш вазирлиги сўнгги 24 соат ичида кокаиндан заҳарланиш ҳолатлари қайд этилган муниципалитетларнинг тиббиёт муассасаларига қўлланмалар билан огоҳлантириш берган. Идора баёнотида таъкидланишича, шифохоналарга оғир аҳволдаги фуқароларнинг олиб келиниши давом этмоқда.
Дастлабки маълумотларга кўра, заҳарланганларнинг барчаси тахминан битта жойдан гиёҳванд моддаларни харид қилган. Провинция хавфсизлик вазири Серхио Берни кокаин бошқа модда билан суюлтирилган бўлиши мумкинлигини ва натижада аралашма янада заҳарлига айланганини маълум қилган. Берни «сўнгги 24 соат ичида гиёҳванд моддаларни харид қилганларни уларни ташлаб юборишга» чақирган. Прокуратура кокаинга қасддан заҳар қўшилгани ҳақидаги версияни кўриб чиқмоқда. Ҳуқуқ-тартибот идораларининг фикрича, гап гиёҳванд моддалар билан савдо қилувчи икки тўданинг қарама-қаршилиги ҳақида кетмоқда.
Бундан аввал Мексика соҳиллари яқинида 1,6 тонна кокаин олиб кетаётган қайиқлар қўлга олингани, Колумбияда қиймати 300 миллион доллардан ортиқ бўлган 10 тонна кокаин мусодара қилингани тўғрисида хабар берилганди.
Изоҳ (0)