Шавкат Мирзиёев «Маданият ва санъат соҳасини янада ривожлантиришга доир қўшимча чора-тадбирлар тўғрисида»ги қарорни имзолади. «Ўзбекистон 24» телеканали эфирида қайд этилишича, қарорда миллий маданият ва санъатни кенг тарғиб қилишга алоҳида эътибор қаратилган.
Қарорга асосан, Маданият вазирлиги томонидан «Инсон қадри учун» эзгу ғояси асосида ҳар йили театрларда саҳналаштириладиган камида 40 та янги спектаклга, композиторлар ва бастакорларга 40 та янги мусиқа асар яратишга, камида 100 та юксак бадиий савиядаги аудиовизуал асарга, камида 150 та энг яхши миллий қўшиқни караоке ёрдамида ижро қилиш учун қайта ишлашга давлат буюртмалари берилади.
Интернет сайтлари ва ижтимоий тармоқларда Маданият вазирлиги саҳифаси орқали миллий маданиятни тарғиб этувчи қуйидаги танловлар жорий этилади:
- мусиқа чолғуларида бажарилган энг яхши 100 та ижро,
- энг яхши 100 та миллий қўшиқ,
- энг яхши 100 та миллий мусиқий клип,
- караоке ёрдамида ижро қилишга мўлжалланган энг яхши 100 та мусиқий композиция,
- давлат ва хусусий театрларда саҳналаштирилган энг яхши 50 та спектакль.
Ҳужжатга кўра, маданият ва санъат соҳасидаги ижодкорларни ҳар йили бир маротаба тақдирлаш мақсадида маданият ва санъат миллий мукофоти таъсис этилмоқда.
Шунингдек, узоқ йиллар маданият ва санъат соҳасида самарали фаолият олиб борганларга ҳамда истеъдодли ёш ижодкорларга ипотека кредити асосида сотиб олинаётган уй-жой қийматининг 50 фоизи миқдорида субсидия берилади.
Аввалроқ ушбу қарор билан Ўзбекистондаги мактаб ўқувчилари камида битта миллий чолғу асбобини чалишни билиши шартлиги белгилангани, барча давлат ташкилотлари ходимларига ҳар чоракда камида бир маротаба концерт, цирк ва театрларга билет ва абонементлар харид қилиш амалиёти жорий этилиши ҳақида хабар берилган эди.
Изоҳ (0)