Қашқадарё вилоятида Ҳисор тоғ тизмаларида жойлашган Ҳисор давлат қўриқхонасида яшайдиган 2 бош қор қоплони камера объективига тушиб қолди. Бу ҳақда Давлат экология қўмитаси хабар қилди.
Қайд этилишича, Ҳисор давлат қўриқхонаси ҳудудида яшайдиган қор қоплони мушуксимонлар оиласига мансуб бўлган ва Қизил китобга киритилган ноёб тур ҳисобланади. Қўриқхонанинг Танхоздарё бўлими давлат назоратчиси Жамшид Бердалиев томонидан Қуралай сойига қўйилган камера объектига 2 бош қор қоплони муҳрланган.
Эслатиб ўтамиз, Ҳисор давлат қўриқхонасида қор қоплони 2020 йилнинг март ва апрель ҳамда 2021 йилнинг январь ойларида ҳам камера объективига тушгани ҳақида хабар берилганди.
2020 йил январь ойининг бошларида Ўзбекистонда аввал учрамаган ҳайвонлар илк бор камерага туширилгани ҳақида хабар берилганди. Февраль ойида эса Устюртдаги тузоқ камералар леопардни расмга олишга муваффақ бўлганди. Угом-Чотқол давлат миллий табиат боғида ўрганишлар чоғида йўқолиб кетиш хавфи остида турган қор қоплони ҳамда оқ тирноқли Тян-Шан қўнғир айиғи фотоқопқонда қайд этилганди.
Изоҳ (0)