Америкалик мутахассисларнинг тадқиқотида локдаунлар COVID-ўлимларни атиги 0,2 фоизга камайтиргани маълум бўлди

2020 йилнинг баҳорида дунё миқёсида коронавирус пандемияси кучайган даврда COVID-19 дан ўлим даражасини пасайтириш учун локдаунларнинг жорий этилиши минимал натижа берди ва амалда кўзланган мақсадга нисбатан бундай чора самарасиз экани маълум бўлди. Бу ҳақда Американинг Жонс Ҳопкинс университети мутахассислари томонидан федерал ва маҳаллий ҳокимият маълумотларини таҳлил қилиш асосида ўтказилган тадқиқот хулосасига таяниб, «ТАСС» хабар берди.

Тадқиқот муаллифларининг аниқлашича, ушбу даврда АҚШ ва Европа мамлакатларида жорий этилган локдаунлар COVID-19 дан ўлим даражасини атиги 0,2 фоизга камайтирган, аммо жуда катта салбий иқтисодий ва ижтимоий оқибатларга олиб келган.

«Мета-таҳлил шуни кўрсатдики, локдаунлар аҳоли саломатлигига нол даражада бўлмаса-да, минимал таъсир қилган, аммо улар жорий қилинган жойда катта иқтисодий ва ижтимоий харажатлар юзага келган. Натижада локдаун сиёсатини асоссиз санаб, пандемияга қарши сиёсий восита сифатида ундан воз кечиш кераклигини таъкидлаш мумкин», — дейилади университети мутахассисларининг хулосасида.

Мета-таҳлил муаллифларининг хулосасига кўра, беморларнинг ўзини яккалаш чораси кўпроқ самара кўрсатган. Барча ижобий ва салбий томонларни ҳисобга олган ҳолда, якунда бу COVID-19 дан ўлимни 2,9 фоизга камайтириш имконини берган. Мутахассисларнинг таъкидлашича, ушбу чора, бир томондан инфекция тарқалишини чеклаган бўлса, иккинчи томондан унинг бир жойда тўпланишини оширган, яъни касалланган одамларнинг оилалари ва атрофидаги одамларга салбий таъсир кўрсатган, чунки улар хавфсизроқ жойларга — боғларга, пляжларга ва бошқа очиқ жойларга кириш ҳуқуқидан маҳрум эди.

Тадқиқот муаллифлари бу даврда ишсизликнинг ўсиши, ўқув жараёни сифатининг пасайиши, оиладаги зўравонлик ва тиббий препаратларнинг дозасини ошириб юбориш ҳолатларининг кўпайиши каби салбий оқибатларини қайд этди. АҚШда 2020 йилнинг майидан 2021 йилнинг апрелигача бўлган даврда меъёрдан ортиқ дори истеъмол қилиш туфайли вафот этганлар сони 28,5 фоизга ошиб, 78,056 нафаргача етди. Оиладаги зўравонлик эса 8,1 фоизга ошди.

«Ушбу ижтимоий харажатларни локдаунларнинг (минимал) ижобий таъсири билан таққослаб кўриш керак, бизнинг мета-таҳлилларимиз энг яхши ҳолатда ҳам уларнинг аҳамияти жуда паст эканини кўрсатди. Фойда ва харажатларнинг ушбу стандарт ҳисоб-китоби қатъий хулосага олиб келади: локдаунларни пандемияга қарши сиёсий восита сифатида қатъиян рад этиш зарур», — дейди Жонс Ҳопкинс мутахассислари.