Қирғизистон ва Тожикистон чегарада ўт очишни тўлиқ тўхтатиш, шунингдек, чегарадаги зиддият жойига жалб этилган қўшимча куч ва воситаларни олиб кетиш тўғрисида келишиб олди. Бу ҳақда Қирғизистон Чегара хизматига таяниб, «Интерфакс» хабар берди.
«Қирғизистон президентининг Боткен вилоятидаги ваколатли вакили Абдикарим Алимбаев ва республиканинг Боткен йўналишидаги чегара вакили Киялбек Тўлонбоевнинг Тожикистоннинг Сўғд вилояти губернатори Ражабба Аҳмадзода ҳамда республика чегара вакили билан музокаралари якунларига кўра, ўт очишни тўлиқ тўхтатиш бўйича, шунингдек, ҳар икки томондан ҳам чегарага жалб қилинган қўшимча куч ва воситаларни доимий жойига олиб кетиш тўғрисида келишувларга эришилди»,— дейилади идора хабарида.
Бундан ташқари музокаралар чоғида томонлар Боткен—Исфана (Қирғизистон) автомобиль йўлида ҳаракатни тиклаш, можароларнинг олдини олиш мақсадида чегара ҳудудларида Қирғизистон ва Тожикистон ҳуқуқ-тартибот идоралари ходимларининг ҳамкорликдаги патруль хизматини ўтказиш тўғрисида келишиб олган.
Музокараларда Қирғизистон ва Тожикистон ҳуқуқ-тартибот идоралари вакиллари ҳам иштирок этган.
Эслатиб ўтамиз, 27 январь куни Қирғизистон чегара хизмати Қирғизистон-Тожикистон чегарасида Боткен—Исфана йўлининг тўсиб қўйилиши ортидан зиддият юзага келгани ҳақида хабар берди. Қирғизистон ва Тожикистон чегара вакиллари ўртасидаги музокаралардан сўнг йўлнинг бир қисми очилди. Аммо кейин Қирғизистон ва Тожикистон чегара қўшинлари бўлинмалари ўртасида тўқнашув бошланди. Қирғизистон Соғлиқни сақлаш вазирлиги маълумотларига кўра, отишмада етти киши жароҳатланган. Республиканинг Фавқулодда вазиятлар вазирлиги хабар беришича, Тожикистон билан чегарадош ҳудуддан деярли 1,5 минг киши эвакуация қилинган.
Тожикистон томони ҳарбийлар ва тинч аҳоли орасида қурбонлар борлигини даъво қилмоқда.
Изоҳ (0)