Ашхободда қора рангли тиббий ниқоблардан фойдаланиш бутунлай тақиқланди. Олдинроқ автомобиль ҳайдовчиларидан оқ ниқобда юриш талаб этилаётганди, деб хабар беради «Turkmen.news».
Нашр манбаларига кўра, эндиликда полициячилар қора ниқоб таққан йўловчиларни тўхтатмоқда. Улар бунинг сабабини изоҳламай, бу ҳақида «ҳаммага айтилганини» билдирмоқда.
Полиция ходимлари «қоидабузарлардан» 50 манат миқдорида жарима тўлашни талаб қилмоқда (жамоат жойида ниқобсиз юриш учун 21 манат жарима белгиланган). Агар фуқаро жаримани жойида тўласа, қўйиб юбориляпти. Баҳслашишга уринса, бўлинмага олиб кетилаётгани айтилмоқда.
Шунингдек, қора ниқобларга қарши «кураш» мактабларда ҳам бошланган. Бу каби ниқобдагилар суратга олиниб, уларнинг ота-оналаридан 50 манат (14,3 доллар) талаб қилиняпти.
ЙПХ ходимлари ашхободлик ҳайдовчилардан оқ ниқобда юришни 2021 йил декабридан буён талаб қилмоқда.
Коронавирус пандемияси бошланган вақтда Туркманистонда ниқоб тақиш тақиқланган эди. Ниқобда юрганлар «ваҳима уйғотишда» айбланган. 2020 йил июлида ЖССТ миссиясининг ташрифидан сўнг, ҳукумат эпидемияга қарши санитария қоидаларини жорий эта бошлади, жумладан, мажбурий ниқоб тақиш. Шу билан бирга, мамлакатда коронавирус расман аниқланмаган.
Аввалроқ Туркманистонда коронавирус ҳақида шеър ёзган блогер 5 йилга қамалгани ҳақида хабар берилганди.
Эслатиб ўтамиз, 2014 йилда туркманистонлик мансабдорлар қора Mercedes’ларини оқ рангдагиларига алмаштиришга мажбур қилинганди. 2015 йилда Туркманистонда қора рангдаги автомобилларни мамлакатга олиб кириш тақиқлаб қўйилгани ҳақида хабарлар тарқалган. 2021 йил декабрига келиб ашхободлик ҳайдовчилар кўзгуни тутиб турувчи қора пластикларни ҳам оқ рангга бўяшга мажбурланган.
Изоҳ (0)