Электр энергияси тармоқларида юзага келган узулишлар сабабли кўп квартирали уйлардаги лифтлар тўхтаб қолган. Бу ҳақда ФВВ матбуот хизмати хабар берди.
Таъкидланишича, қутқарувчилар томонидан ҳозиргача 10 дан ортиқ фуқаро лифтдан чиқариб олинган. Айни вақтда ФВВ қутқарувчилари жойларда зарурий тадбирларни амалга оширмоқда.
Шунингдек, Электр энергияси тармоқларида юзага келган узулишлар сабабли Бўстонлиқ тумани Чимён ва Белдирсой тоғ дор йўллари тўхтаб қолган. Қутқарувчилар томонидан Чимён тоғ дор йўлидан 20 нафар ва Белдирсой тоғ дор йўлидан 60 нафар, жами 80 нафар фуқаро хавфсиз жойга олиб тушилган. «Амирсой» тоғ-чанғи курортида эса электр энергияси таъминоти ўчганидан 10 дақиқа ўтиб, қайта тикланган. У ерга қутқарувчиларнинг ёрдами талаб этилмагани айтилмоқда.
Энергетика вазирлигининг маълум қилишича, Қозоғистон Электр тармоғида катта авария бўлиши оқибатида Олмаота, Чимкент, Тарас, Туркистон (вилоятларида) ва атроф ҳудудларида электр энергия таъминотида ўчишлар юзага келган. Вазирлик маълумотларига кўра, ҳозирда Тошкент вилоятидаги Чорвоқ, Хожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган.
Изоҳ (0)