Afg‘onistonda 2021-yil avgust oyida hokimiyat tepasiga kelgan va o‘z hukumatini tuzgan “Tolibon” harakati Yevropa ittifoqining Kobuldagi vakolatxonasi faoliyatini qaytadan boshlaganini ma’lum qildi. Bu boradagi bayonot toliblar tomonidan Afg‘oniston tashqi ishlari vazirligi matbuot kotibligiga tayinlangan Abdulqahhor Balxiy tomonidan Twitter’ga joylashtirilgan, deb xabar bermoqda “TASS”.
“Bir qator uchrashuvlar va Yevroittifoq vakillari bilan kelishuvlardan keyin YeI Kobuldagi vakolatxonasining faoliyatini qayta tikladi va amaliy jihatdan ishlashga kirishdi”, – deya yozgan toliblar vakili.
Bundan tashqari, xabarda Yevroittifoqning Afg‘oniston xalqiga ijtimoiy yordam sifatida ajratgan 220 million yevrodan tashqari yana 265 million yevro mablag‘ yuborilishi va ushbu pullar o‘qituvchilar maoshi uchun ajratilishi qayd etilgan.
“Tolibon” 2021-yilda AQSh o‘z qo‘shinlarini Afg‘oniston hududidan olib chiqib ketishni boshlaganidan keyin mamlakatda hukumatni egallash uchun kurash boshlagandi. O‘tgan yili 15-avgustda toliblar Kobulni jangsiz egalladi, prezident Ashraf G‘ani esa respublikadan chiqib ketdi.
Shundan keyin bir nechta mamlakatlar va xalqaro tashkilotlar Kobuldagi vakolatxonalar, elchixona va konsulliklarda ishlovchi xodimlari, ularga xizmat qilgan afg‘onistonliklarni poytaxtda evakuatsiya qilishni boshladi. Bryussel Yevroittifoq mamlakatlarining Afg‘onistondan jami 17,5 ming nafar odamni, xususan YeIning Kobuldagi missiyasida ishlagan 520 nafar yevropaliklar, ular bilan birga ishlagan mahalliy aholi vakillari va ularning oila a’zolari Kobuldan boshqa joyga ko‘chirilganini bildirgan.
2021-yil dekabr oyining boshlarida Yevropa ittifoqi tashqi siyosiy xizmatining vakili Nabila Massrali bir necha hafta ichida YeI vakolatxonasi Kobulda qayta ish boshlashi, biroq bu Bryusselning “Tolibon” Afg‘onistonda tuzgan hukumatni tan olganliginin anglatmasligi haqida gapirgandi.
Izoh (0)