АҚШ президенти Жо Байден COVID-19 туфайли бошқа локдаунлар кутилмаётгани, мактабларни ёпиш режада йўқлигини айтди. Унинг сўзларига кўра, мамлакатда коронавирусга қарши курашиш учун барча воситалар мавжуд.
«Бизда бизнес ва мактабларни ёпмаслик, ҳаётни сақлаб қолиш учун зарур воситалар: вакциналар, бустер дозалар, ниқоблар, тестлар, дорилар мавжуд», — деди Байден АҚШ президенти сифатида иш бошлаганига бир йил бўлгани муносабати билан ўтказган матбуот анжуманида.
Унинг сўзларига кўра, айни дамда АҚШда аҳолининг 75 фоизи эмланган. Вакцина олмаганлар ўтган ёзда 90 миллион эди, бугун эса улар 35 миллион, дея таъкидлади Байден.
1,5 соатдан ортиқ давом этган матбуот анжуманида Байден, шунингдек, Россия Украинага ҳужум қилса, уни «иқтисодий фалокат» кутаётгани ҳақида гапирди.
Бундан ташқари Байден АҚШдаги 2024 йилги президентлик сайловларида амалдаги вице-президент Камала Харрис билан иштирок этмоқчилигини маълум қилди.
Кейинроқ АҚШ собиқ президенти Дональд Трамп Байденнинг матбуот анжуманида ўзини тутишини танқид қилди.
«Байденнинг журналистларга рўйхат бўйича мурожаат қилиши, фақат енгил саволлар олиши ва жавобларни ўқиб беришини қандай қабул қилиш мумкин» — дея ғазабланган Трамп.
Трампнинг айтишича, у бундай қилмаган бўларди ва унинг бундай қилишига имкон ҳам берилмасди.
Изоҳ (0)